Әлем чемпионаты басталмас бұрын 6 фавориттің аты аталды. Еуропадан төртеу: Германия, Испания, Франция, Португалия. Ал қалған екі фаворит Латын Америкасынан: Бразилия мен Аргентина болатын. Енді міне, бұл тізімде болған командалардан 2 ұжым ғана қалып отыр. Франция мен Бразилия. Ширек финалға шыққандардың ішінен енді біз кімдердің бәсі жоғары болуы мүмкін екендігіне тоқталсақ. Әрине тізімге тағы 2 команданы қоссақ болады. Алайда Бельгия мен Англияның жолы екіге бөлінген. Бір топтан шыққан қарсыластар финалда ғана кездесе алады. Ал топтан екінші орын алып, әлсіздер жағына шығып кеткен ағылшындардың жолы болды. Колумбияны әупірімдеп жүріп жеңгеннен соң, оларды Швеция күтіп тұр. Айтпақшы әлем чемпионаттарының тарихында Англия үш мәрте ойын соңынан кейінгі пенальтиден жеңілген екен. Осы жолы Гарет Саутгейт командасы осы бір жағымсыз жайды аттап өтті. Бұл ненің белгісі екенін әзірге ешкім білмейді.
Осы ойыннан соң мамандар Англияны биыл чемпион болуы мүмкін деген құраманың қатарына қосты. Расымен де, Тұманды Альбионның командасы биыл талантты жастардан құралды. Енді олар скандинавиялық құраманы айналып өтсе болды, жартылай финалға шығады. Ал Швеция Англияның үнемі жеңіп жүрген командасы десек артық емес.
Уругвай – Франция арасындағы текетіресте анық лидер еуропалықтар екені түсінікті. Дегенмен топтық кезеңде қақпасына гол жібермеген Уругвай қорғанысымен таңғалдыруда. Португалия қорғаушысы Пепе соққан жалғыз гол уругвайлық қақпашы Фернандо Муслераны өз амплуасындағылардан бір бас жоғары шығарып тұр. Чемпионаттың үздік қақпашысы, яғни алтын қолғапты да осы қақпашы алуы мүмкін. Ол үшін Уругвай кем дегенде жартылай финалға шығуы тиіс. Бірақ букмекерлік кеңселер Франция жартылай финалға жолдама алады деп сенімді сөйлеп отыр. Олар сирек қателесетінін ескере отырайық.
Бразилия-Бельгия жұбында нақты көшбасшы жоқ. Бірақ ойын алдындағы сандар мен фактілер «селесао» командасына басымдық беріп тұр. Себебі Бразилия Бельгияға қарағанда, аз гол жіберіп, 1/8 финалда аса қатты қиындық көре қойған жоқ. Әлемнің 5 дүркін чемпионы Мексиканы 2:0 есебімен айқын жеңді. Жалпы, 1/8 финалда ешқандай команда қарсыласын 2 доп айырмасымен ұта алған жоқ. Ал Бельгия Жапониядан 2 доп айырмасымен ұтылып жатып, соңғы секундтарда ғана жеңісті жұлып әкетті. Бірақ Роберто Мартинестің командасы күн сайын қарқынға қарқын қосып келе жатқандай. Сондықтан да Бельгия мен Бразилияның келесі кезеңге өту пайызы 50-50 дер едік.
Ресей – Хорватия жұбы. Хорватияның келесі кезеңге өтетін мүмкіндігі мол екендігі түсінікті. Шақпақ жейделі команда әлемнің үздік клубтарында ойнайтын футболшылармен жасақталған. 11 ойыншысының деңгейі біркелкі. Ал қақпашысы Даниель Субашич 3 пенальти қайтарып, көрермен көзайымына айналды. Бірақ жарыс Ресей жерінде өтіп жатқандықтан Хорватияға бұл ойын оңай соқпайтыны анық. Оның үстіне атақты Испанияны жарыстан шығарып жіберген ресейліктер енді өз күштеріне сенімді күйде хорваттарды да тықсырып тастаймыз деп білек сыбанып отыр. Бұл жұптың жеңімпазы Англия-Швеция текетіресінің жеңімпазымен кездеседі.
Сонымен ширек финалдың ойындары 6-7 шілде күндері ойналады.
Ермұхамед Мәулен,
«Егемен Қазақстан»