Жиын барысында тараптар салада енгізілген жаңашылдықтарды талқылап, тәжірибе алмасу барысын тілге тиек етті. Басқосу барысында әлемдік медианың даму барысы да сөз болды. «Қазмедиа орталығы» бас директорының стратегиялық даму және халықаралық ынтымақтастық жөніндегі орынбасары Ерлік Қаражан жүргізген жиынға «Хабар» агенттігі» АҚ басқарма төрағасы Алан Әжібаев, AIR India бас директоры Фаяз Шехряр, COPEAM бас хатшысы Клаудио Каппон қатысты.
Жиын барысында Румыния радиосының сәлемдесу сөзі мен Қазақстан Республикасы Ақпарат және коммуникациялар министрі Дәурен Абаевтың құттықтау сөзі оқылды.
«Мен ең алдымен осындай маңызды шараға қатысушы ретінде келгеніме қуаныштымын. Бұл конференция медиа саласының көп мәселелері бойынша Еуропа мен Азия арасында диалог орнатады. Мұндай жиын халықаралық және ұлттық телерадио хабарын таратушыларды, қауымдастықтарды, жеке медиа компанияларды, сонымен қатар Еуропа мен Азияның жетекші медиа менеджерлерінің басын қосып, өзара тәжірибе алмасудың таптырмас алаңы деуге болады. Біздің ұйым ақпарат тарату саласынан бөлек, жас журналистерді мамандыққа баулу, оларға тренинг түрінде тәжірибе беру жұмыстарымен де тұрақты түрде айналысып келеді. Жұмысымызды негізгі екі бағытқа бөліп қарастыруға болады. Олар, ең бірінші ұйымның білікті мүшелерінің басын қосып, ақпарат кеңістігіндегі жаңашылдықтарды жинақтау. Екіншісі, өзіміздің білгенімізді әртүрлі жоғары оқу орындарынан құралған студенттермен бөлісу. Осы орайда түрлі шаралар мен фестивальдар ұйымдастырдық. Сонымен қатар радио мен телеарналардан бөлек бізде 3 радиожурнал жұмыс жасайды. Әрқайсының алар орны айрықша», деді COPEAM бас хатшысы Клаудио Каппон.
Бұл жиын «Медиа диалог: Орталық Азияға назар аудару» тақырыбымен өрбіді. Сондай-ақ беделді спикерлер бас қосқан ауқымды шарада жалған ақпарат таратушылармен күрес мәселесі де кеңінен талқыланып, одан қорғану жолдары да көтерілді. Ресми расталмаған ақпарат тарату заңмен қудаланатыны белгілі. Мұндай жалған жаңалықтар тек Қазақстанның ғана емес, бүгінгі таңда әлем елдерінің де баса назар аударатын мәселесі болып отыр. Осы орайда дәстүрлі емес БАҚ өкілдеріне иланатын аудиторияның ауқымы кеңейіп келе жатқанын шараға қатысушылар тілге тиек етті.
«Шығыс пен Батыс елдері арасында ақпарат тарату кезінде бөлінушілік байқалады. Яғни Батыстың басты ақпарат арналары Шығыста болып жатқан оқиғаларды халыққа объективті түрде жеткізбейді. Сондықтан қос құрлық арасында осындай диалогтің болғандығы дұрыс», дейді AIR India бас директоры Фаяз Шехряр.
Ал «Франц Медиамун» компаниясының халықаралық қатынастары бойынша директоры Джон Макуайер әріптесінің пікірін құптап, бұл проблеманың туындауына медиа нарықтың жекешелендірілуі де әсер етуі мүмкін екенін тілге тиек етіп, осы ретте бірігіп жұмыс істеп, ақпарат құралдарының мәртебесін одан әрі көтеру керектігін жеткізді. Шара барысында сөз алған «Хабар» аенттігі» АҚ басқарма төрағасы Алан Әжібаев агенттік құрамындағы арналардың жұмыс жүйесімен таныстырып, атқарылып жатқан шаруаларды тілге тиек етті. Бұдан бөлек конференцияның басқа сессияларында әртүрлі маңызды мәселелер көтерілді.
Рауан ҚАЙДАР,
«Егемен Қазақстан»
