«Денсаулық кепілі – Будь здоров! – Be healthy!» ұранымен өткен шара барысында флэшмоб, шатыр астындағы «Денсаулық қалашығының» жұмысы, шұғыл жәрдем дағдыларына үйрету сияқты бағдарламалар жүзеге асты. Сонымен қатар акция аясында онколог, кардиолог, фтизиатр, рентген-лаборант, эндокринолог, педиатр мамандардан құралған мобильді медициналық бригадалар жұмыс істеді. Бейінді мамандар тұрғындарға консультативтік-диагностикалық көмек көрсетті.
Өз сөзінде Қоғамдық денсаулық сақтау ұлттық орталығының бас директоры Уәлихан Ахметов Елбасының «Төртінші өнеркәсіптік революция жағдайындағы жаңа мүмкіндіктер» атты Жолдауында саламатты өмір салтын насихаттай отырып, қоғамдық денсаулықты басқару ісін күшейту қажеттігіне назар аударғанын атап өтті. «Жолдауды іске асыру мақсатында Денсаулық сақтау министрлігі халықты саламатты өмір салты қағидаттары туралы ақпараттандыруға бағытталған қоғамдық денсаулықты нығайту жөнінде жоспар әзірледі», деді ол. Сондай-ақ Мемлекет басшысы қазақстандықтарды спортпен шұғылдануға шақырғанын және «Challenge, сен басқасың!» спорттық бастамасын қолдағанын айтты. «Бүгін біз «Саламаттылық әдеттері» марафонын бастап отырмыз. Қарапайым іс-әрекеттер әр адамға аурудың алдын алуға және өмір сүру сапасын арттыруға мүмкіндік береді. Бас қаламыздың 20 жылдығы аясындағы эстафетаны еліміздің басқа да өңірлері жалғастырмақшы», деді орталық басшысы.
Сондай-ақ «Саламаттылық әдеттері» марафонында дастарқаннан тұз солонкасын алып тастау, тәулігіне 2 литр су ішу, күнделікті 10 мың қадам жүру сияқты ұсыныстар айтылды. Қоғамдық денсаулық сақтау ұлттық орталығының, бас қаланың, Алматы ауданының, денсаулық сақтау басқармасы басшылығының өздері де үлгі-өнеге болып, сау әдеттердің жолын нұсқап, манекен арқылы жүрек-өкпені реанимациялау кезінде шұғыл көмек көрсету дағдыларын көрсетті.
Марафонға қатысушылар достарын, туған-туысқандарын, әріптестерін, таныстарын өзінің таңдауы бойынша фастфудтан, газды сусындардан, тәтті тағамдардан бас тартуға, жеміс-жидектер таңдауға, сондай-ақ 100 рет сергіту жаттығуларын жасауға және эстафетаны әрі қарай «Ал сіздің қолыңыздан келе ме?» ұранымен жалғастыруға шақырды. Марафон бүкіл елімізде «Денсаулық жолы» аясында өтеді.
Мирас АСАН,
«Егемен Қазақстан»
