Әскери-теңіз күштерінің белсенді жаңару және қайта жабдықтау үдерісін ескере отырып, курсанттарға «Алатау» мина-тартқыш кораблі мен «Жайық» гидрографиялық кемесінде таңдап алған мамандықтары бойынша тәжірибелік дағдыларын меңгеру мүмкіндігі берілген. Курсанттар екі ай бойы әскери кафедрада алған білімдерін іс жүзінде қолдануға дағдыланып, кәсіби тәжірибе бағдарламасы толық көлемде орындалған соң ғана өздерінің оқу орындарына қайта оралды.
Қорғаныс министрлігінің ресми ақпараттарына сүйенсек, Әскери теңіз күштері қолбасшылығы алдағы уақытта да техника мен қару-жарақтың жаңа үлгілерін пайдаланатын мамандарға қойылатын талаптарға жауынгерлік корабльдерде әскери-теңіз білім беру мекемелері оқушыларының тәжірибеден өтуін әрі қарай жандандыруды жоспарлауда.
Жалпы Қарулы Күштерде алғаш рет әскери-ғылыми взвод құрамында мерзімді әскери қызмет өткеру үшін жастарды шақыру тәжірибесі басталғанын да айта кету керек. Қорғаныс министрлігінің шешімімен жаңадан құрылатын әскери-ғылыми взвод құрамында белгілі бір біліктілігі бар дипломды шақырылушыларды пайдалану тәртібі бекітіліп, оны іске асыру тетіктері пысықталған.
Қазіргі уақытта шақырылған жастар 68665 әскери бөлімінің базасында жинақталуда. Оларды іріктеуде робот техникасы, ақпараттық технологиялар мен киберқауіпсіздік саласындағы біліктіліктері ескерілген.
Әскери-ғылыми взвод Қазақтан Республикасының Тұңғыш Президенті – Елбасы атындағы Ұлттық қорғаныс университеті Әскери-ғылыми зерттеу орталығының құрамында әскери басқару органдары мүддесінде қолданбалы және іргелі зерттеулер саласындағы перспективалық ғылыми-зерттеу, тәжірибелі-құрастыру және сынама жұмыстарын орындау мақсатында құрылған.
Серік ӘБДІБЕК,
«Егемен Қазақстан»