Салтанатты жиынды ашқан ҚазҰУ ректоры, академик Ғалымқайыр Мұтанов Асқар Закариннің отандық жоғары білімді дамытуға қосқан зор үлесі жайлы сөз қозғады. Қабырғалы қайраткер ғылыми мектеп құрып, соңынан шәкірт ертті, оқу орнының халықаралық ғылыми байланыстарын дамытты, студенттік қалашықтың негізін қалады, механика-математика факультетінің жаңа ғимаратын тұрғызды. А.Закарин гидробиология, ихтиология, метеорология, жоғары математика, орыс филологиясы, қатты денелер физикасы және басқа жаңа кафедралардың, жоғары оқу орындары үшін біліктілікті арттыру факультеті мен философия-экономика факультетінің, студенттердің Мұхтар Әуезов атындағы әдеби бірлестігі мен «Жеті муза» қоғамының ашылуына мұрындық болды.
Асқар Закарияұлының ғалым, ұйымдастырушы және тұлға ретіндегі бейнесін оның бел баласы, Мемлекеттік сыйлықтың лауреаты, физик-ғалым Едіге Закарин тебірене еске алды. Профессор А.Закарин мемлекет қайраткері ретінде талай асудан өтіп, Қазақ КСР Жоғарғы Кеңесінің төрағасы, Қазақстан Үкіметі төрағасының орынбасары, Оқу-ағарту министрі, Сыртқы істер министрі, Қазақ КСР Жоғарғы Кеңесінің депутаты қызметтерін абыроймен атқарғанын тілге тиек еткен Едіге Асқарұлы алқалы жиынды ұйымдастырған университет басшылығына алғысын білдірді.
Жинақтың бас редакторы, академик Ғ.Мұтановтың алғысөзімен ашылған кітапқа Асқар Закариннің Мәскеуде жарық көрген іргелі ғылыми жұмыстарымен қатар оның қазақ тілінде талапкер жастарға арнап жазған «Геометрияның алғашқы ұғымдары», «Теңдеулер мен топтар», «Афиндік геометрия» сияқты еңбектері, Эварист Галуа, Нильс Генрик Абель, Альберт Эйнштейн сынды ұлы ғалымдар жайындағы жазбалары енген. Жинақта сондай-ақ академиктер Өмірзақ Сұлтанғазин, Иса Байтулин, Зұлқайыр Мансұров және Төлеген Қожамқұловтың қайраткер туралы мақалалары, белгілі жазушы-журналист Қайсар Әлімнің «Заңғар Закарин» атты көлемді очеркі, ақын Серік Тұрғынбековтің естелігі, университеттің кафедра меңгерушісі Жетпісбай Бекболатұлының «Парызға адалдық» атты ғұмырнамалық баяны берілген.
Қоңыр МҰҚАТАЕВА,
әл-Фараби атындағы ҚазҰУ доценті