Бүгінде алыс және жақын шет елдерден 150-ден астам талапкер Ұлттық университетке түсу үшін онлайн жүйе арқылы тіркеліп, құжаттарын тапсырды. Қазір олардың өтініштері қабылданып, ендігі кезекте оқу орнына талапқа сәйкес қашықтықтан қабылдана алады. Бразилия, АҚШ, Франция, Германия, Индонезия, Оңтүстік Корея, Түркия, Үндістан және тағы басқа мемлекеттердің азаматтары осы жүйе арқылы өтініштерін білдіріп отыр.
Университеттің Оқу ісі жөніндегі проректоры Асқар Хикметов биыл шетелдік студенттердің үлкен легі қабылданатынын жеткізді. Жоғары халықаралық стандарттарға сай келетін білім беру бағдарламалары, сондай-ақ ағылшын тілінде оқу мүмкіндігі, заманауи кітапхана, студенттерге қызмет көрсету орталығы, спорт кешені және жайлы жатақханалар орналасқан бірегей университет кешені талапкерлердің қызығушылығын туғызуда. Ұлттық университетте олар сапалы білім алумен қатар ғылыми және шығармашылық әлеуетін жүзеге асыруға мүмкіндік алады.
Жаңа оқу жылында 600 шетелдік студент қабылданады деп жоспарланған. Жалпы медицина, ақпараттық жүйелер, халықаралық қатынастар, менеджмент, биотехнология, қазақ және орыс тілдерін оқу сияқты мамандықтар жоғары сұранысқа ие болып отыр.
Эльвира Серікқызы,
«Егемен Қазақстан»