Бурабай баурайындағы Шортан көлінде желкен керген жарысқа қатысушылар 2015 жылдан бастап қолға алынған осы бір әдемі шараның бүгінгі жалғастырушылары. Әр жыл сайын үзіліп түскен моншақтай әсем Шортан көлінің жағасында әлемдік додаларда дүркірей топ жарып жүрген желкенді қайық спорты үздіктерінің басы қосылады. Мәселен, 2012 жылы Хайкоуда өткен әлем чемпионатына қатысушы, Ресей Федерациясы чемпионаттарының бірнеше мәрте жеңімпазы, спорт шебері, желкенді жарыстың жампозы Александр Пархоменко және Ресейде өткен талай жарыста топ жарған көкшетаулық Сергей Воронов осы жолы да желкенді қайық жарысын қыздыра түсті.
Бұл жолғы жарысқа Балқаш, Петропавл, Мәскеу, Екатеринбург, Омбы сияқты қалалардың спортшылары қатысты. Бұрынғы жарыстардан бір ерекшелігі, бұл жолғы шараны облыстық әкімдік қолдап, дүйім елдің назарын Бурабайға аударды. Жалғыз жарыс қана емес, рухани нәрі мол шаралар да көп болды. Осы орайда:
– Алдағы уақытта осындай қолдау болатын болса, желкенді қайық жарысының айы оңынан туады, – деп разылығын білдірді Сергей Воронов.
Ашылу салтанаты да ажарлы, айшуақ салтанатымен көрерменнің көңілін тоғайтарлық болып өткізілді. Тіпті, көл үстінде шарқ ұрған шағала да шулы жарысқа тамсанып өз үнін қосып тұрғандай. Екі күн бойы өздерінің темірдей төзімділіктерін, ақбас толқындары аспанға ата толықси толқыған көл бетіндегі шеберліктерін сынға салған жарыс барысында әрбір команданың жеңіске деген құштарлығы айқын аңғарылып тұрды.
Жарыс соңында қазылар алқасының шешімі бойынша көл бетінде қайығын көптен оздырған Екатеринбург қаласының командасы жеңімпаз атанды. Бір айта кетерлігі, өткен жылғы сайыста да осы команданың мерейі үстем болған. Екінші орынға Ақмола облысының командасы ие болса, үшінші орын тағы да ресейліктерге бұйырды.
Байқал БАЙӘДІЛ,
«Егемен Қазақстан»
