Жиынға Денсаулық сақтау саласының мамандары мен қоғамдық бірлестіктердің өкілдері қатысты. Сонымен қатар Денсаулық сақтау министрінің міндетін атқарушы Алексей Цойға өзінің мәселесін жеткізу үшін өңірлердегі тұрғындар бейнеконференцбайланыс арқылы қосылып, талап арыздарын жеткізді.
Солардың қатарында Жамбыл облысы, Тұрар Рысқұлов ауданынан тікелей байланысқа шыққан Асхат Файзуллин жаңа туған баласының өліміне қатысты Т.Рысқұлов атындағы аудандық аурухана дәрігерлерінің үстінен шағым айтты.
Тұрар Рысқұлов ауданының тұрғынының шағымын тыңдаған А.Цой аталған мәселе бойынша Денсаулық сақтау министрлігіне арыз келіп түскенін мәлімдеді. Сондай-ақ Қоғамдық денсаулық сақтау комитетінің өкілі осы іс бойынша жоспардан тыс тексеріс жұмыстары жүргізіліп жатқанын, тексеріс комиссиясының құрамында тәуелсіз сарапшылардың бар екенін және олар істі аяқтаған соң Асхат Файзуллинге хабар беретіндіктерін жеткізді.
Республикалық қоғамдық қабылдау бөлмесінде бейнебайланыстан бөлек, Астана, Көкшетау, Атырау қаласының тұрғындары Денсаулық сақтау министрінің міндетін атқарушы А.Цоймен бетпе-бет жолығып, өз өтініштері мен арызшағымдарын тікелей айтуға мүмкіндік алды. Алексей Цой қабылдауға келген барлық тұрғынның мәселелерін тыңдап, алдағы уақытта тиісті жұмыстар жүргізілетінін айтты.
Рауан ҚАЙДАР,
«Егемен Қазақстан»
