Өткен жұма облыстық мекемелер тарихында, мекеме қызметкерлерінің өмірбаянында өшпестей із қалдыратын күн болды. Олай дейтініміз, Түркістан облысы әкімдігінің мемлекеттік қызметкерлері Шымкент қаласынан облыс орталығы – Түркістан шаһарына көшті. Бұл жолғы көш мерекелік реңк алып, тарихи сәт есте қалатындай өтті. Көңілді әуен, патриоттық әндер, көліктердегі жігерлендіретін жазулар, көшетіндердің көтеріңкі көңіл күйі... заманауи қондырғылар арқылы бейнетаспаға жазылып, фотоға түсіріліп жатты. Салтанатты көштің ресми бөлігін ашқан облыс әкімі Жансейіт Түймебаев екі ғасыр бойы Қазақ хандығының астанасы болған, маңызды шешімдер қабылданған Түркістанға ат басын бұрып, қызмет етуге бара жатқан азаматтар, жалынды жастар тарих алдындағы ұлы мұраттарының бірін орындап жатыр деуге толық негіз бар екенін атап өтті.
– Әрбір мемлекеттің, әрбір облыстың, әрбір қаланың тарихында жауапты кезеңдер болады. Биыл 19 маусымда Елбасы Жарлығымен бұрынғы Оңтүстік Қазақстан облысы Түркістан облысы болып құрылып, оның орталығы деп Түркістан қаласы бекітілді. Бұл тарихи шешімге 2 ай жетер-жетпес уақыттың өзінде біз тынбай жұмыс істеп, Елбасы Жарлығын орындауға бар күшімізді салдық. Түркістан қаласында облыс әкімдігіне қарасты 24 басқарма мен облыстық мәслихат, қоғамдық кеңес пен департамент қызметкерлері отыратын кеңселер даярланды. Бүгін біз үлкен көшті бастайық деп отырмыз. Кезінде Елбасы Астанаға көшер кезде «Алматыға сыймай емес, Алматыны қимай кетіп барамыз» деген екен. Біз де Шымкентке сыймай емес, оны қимай кетіп барамыз. Түркістан – бар қазақтың рухани астанасы. Сондықтан оны дамытуға, өркендетуге күш салуымыз қажет. Шежірелі қаланың туристік әлеуеті көтеріліп, жаңа жұмыс орындары ашылады. Міне, енді Түркістан облысы мен Түркістан қаласының жаңа дәуірі басталды, – деді облыс әкімі.
Ал белгілі жазушы, «Алаш» халықаралық сыйлығының лауреаты Мархабат Байғұт орнығып қалған орнынан көшу оңай болмастығын, алда қиындықтар кездесетінін, «сол қиындықтарды жұмыла істейтін жұмыс жеңетінін» айтты. Мемлекет және қоғам қайраткері Шалатай Мырзахметов әкімдік қызметкерлеріне қызметте жетістіктер мен табыс тіледі. Шығарып салушылар да құр қол келмепті, жол жүретіндерге қымызы мен бауырсағын таратқандар көп. Өңір басшысы бастаған үлкен көштің құрамында облыс әкімінің орынбасарлары және аппарат басшысы, облыстық мәслихат хатшысы мен аппараты, облыстық қоғамдық кеңестің төрағасы және аппараты, «Нұр Отан» партиясының облыстық филиалы төрағасының бірінші орынбасары және қызметкерлері, облыстың зиялы қауым өкілдері, облыс ардагерлері, құзырлы орган басшылары, әкім аппараты қызметкерлері, 28 аумақтық департаменттің басшылары мен қызметкерлері, 24 облыстық басқарма басшылары мен қызметкерлері, республикалық және жергілікті БАҚ өкілдері сынды, жалпы саны мыңға жуық адам бар.
Осылайша мыңға жуық мемлекеттік қызметкер тұрғындар саны артып, соған орай қала тіршілігі өзгеріп, жаңа дәуірі басталған Түркістанда жұмысын жалғастырады.
Ғалымжан ЕЛШІБАЙ,
«Егемен Қазақстан»
Түркістан облысы