Маңғыстау облысында өткен биылғы байқауға өңірдегі 30-дан астам кәсіпорын қатысып, оның 14-і көрмеге өнімдерін шығарды. Сондай-ақ байқауда танымал кәсіпорындармен қатар кәсібін жаңадан бастаған тауар өндірушілердің де өнімдерімен танысуға мүмкіндік туды.
Маңғыстау облысы әкімінің орынбасары Р.Сакеев өңірдің әлеуметтік-экономикалық тынысына тоқталды.
– Маңғыстау облысы Қазақстанның ең қарқынды дамып келе жатқан аймағының бірі, елдің ішкі жалпы өнімі 5,6%- тін құрайды. Жыл сайын біздің облыста орта есеппен 914 жаңа кәсіпорын ашылады. Қазіргі уақытта шағын және орта бизнес субъектілерінің саны 9505-тен асады. «Атамекен» кәсіпкерлік палатасы көмегімен шағын несие беру бағдарламалары, соның ішінде ауыл кәсіпкерлерін қаржыландыру бойынша ақпараттандыру жұмыстары жүргізілуде, − деді аймақ басшысының орынбасары.
Маңғыстау облысында 306 ірі және орта бизнес субъектісі бар. Үдемелі индустриялық-инновациялық дамудың мемлекеттік бағдарламасы бойынша облыстың Индустрияландыру картасына 22 жоба енгізілген. Қазіргі таңда өңірде Еуразиялық экономикалық қауымдастығы (ЕурАзЭҚ) мен Дүниежүзілік сауда ұйымы (ДСҰ) аясында жоғары сапалы әрі бәсекеге қабілетті өнімдерді шығару басты назарда.
− Мемлекет басшысы «Стратегия-2050» бағдарламасында отандық бизнесті ішкі табысты өсірудің ең маңызды көзі ретінде белгіледі. Маңғыстау кәсіпкерлері жаңа бастамаларды белсенді түрде қолдайтынына сенімдімін. Осылайша олар экономиканың өсуіне және халықтың әл-ауқатының одан әрі жақсаруына үлес қосады, − дейді «Атамекен» кәсіпкерлер палатасы өңірлік филиалының директоры Нұрбек Қарасаев.
Сараптамалық комиссияның таңдауымен «Өңірлік мақсаттағы үздік тауарлар» аталымы бойынша – «Каспий Битум» ЖШС, «Каскор-Машзавод» АҚ, «Паркер-Казахстан» ЖШС топ жарса, «Халық тұтынатын үздік тауарлар» аталымында «Жанарыс» ЖШС, «Жекенова Әсел» ЖК мен «Домик» ЖК жеңіске жетті. Ал «Үздік азық-түлік тауарлары» аталымы бойынша жүлделерді «Сельскохозяйственный кооператив «Сегизбай Ата» ӨК мен «Саукымбек» ЖШС және «Берекет-Ф» ЖШС иеленді.
Жүлдегер тауар өндірушілер Маңғыстау облысы атынан күзде Астана қаласында өтетін «Қазақстанның үздік тауары» республикалық байқауына және «Қазақстанда жасалған» көрмесіне қатысатын болады.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы