Төрткүл дүниенің теңдессіздерін басын қосқан Ақ Олимпиада былтыр Оңтүстік Кореяның Пхенчхан қаласында дүркіреп тұрып өткен болатын. 2022 жылы айтулы жарыс Қытайдың бас шаһары – Бейжіңде ұйымдастырылады. Ал 2026 жылы алауы тұтануға тиіс байрақты бәсекені қай қаланың қабылдайтыны келесі жылдың қыркүйек айында Италиядағы ең көрікті шаһарлардың бірі – Миланда өтетін Халықаралық Олимпиада комитетінің (ХОҚ) конгрессі барысында белгілі болады.
Әзірге бес үміткер бар. Олар – Канаданың Калгари, Түркияның Эрзурум, Жапонияның Саппоро, Швецияның Стокгольм және Италияның Милан, Турин және Кортина-д'Ампеццо қалалары. Олардың біразуында бұған дейінде талай дүбірлі дода өткен. Атап айтсақ, Калгари 1988 жылғы қысқы Олимпия ойындарын қабылдады. Кезінде Кортина-д'Ампеццо (1956) мен Туринде (2006) де Ақ Олимпиаданың алауы тұтанған. Стокгольмде 1912 жылғы жазғы дода ұйымдастырылған болатын.
Ғалым СҮЛЕЙМЕН,
«Егемен Қазақстан»
