Патриоттар партиясының Алматы қалалық комитетінің бірінші хатшысы Гүлдана Нұрпейісова және өзге де белсенді мүшелері кеше қалалық жол полициясы бөліміне арнайы бас сұқты. Онда жол полициясының жұмысы мен олардың мәртебесі және жол қауіпсіздігі сияқты мәселелер кеңінен сөз болды. Соның ішінде жол полициясы қызметкерлерінің әлеуметтік пакеттерін енгізу қажеттігі, жалақыларының жоғары болуы және зейнетақымен қамтамасыз етудің жетілдірілуі қажеттігі де назардан тыс қалған жоқ.
Осы орайда партия тарапынан қалалық жол полициясы ғимаратында осы сала қызметкерлері алдында арнайы жаңажылдық концерт ұйымдастырылғандығын да айта кету керек. Сонымен қатар, партия белсенділері көше-көше бойымен жүріп өтіп, қала тұрғындарымен жүздесті. Бұдан басқа патриоттар қалалық жедел жәрдем стансасына барып, мұнда да концерт ұйымдастырды. Артынан медицина қызметкерлерінің басындағы жағдай әңгіме өзегіне айналды. Дәрігерлердің жалақысын көтеру, қазіргі заманға сай құрал-жабдықтармен қамтамасыз ету мәселелері көтерілді. Жол полициясы мен жедел жәрдем қызметкерлері де жаңа жылда жұмыс орындарында болатындығы белгілі. Күндіз-түні тыным таппайтын осы сала қызметкерлерінің жағдайы жан-жақты жасалуы керек, соның ішінде жалақыларын көтеру керек, деп есептейді патриоттықтар.
Сондай-ақ патриоттық белсенділер Алматыдағы Мәңгі алауға барып гүл шоқтарын қойып, Ауған және Ұлы Отан соғысының шейіт болған ардагерлеріне тағзым етті. Ұлы Отан соғысы кезінде қазақстандық Панфилов дивизиясы Мәскеу түбінде немістердің шабуылына тойтарыс бергені тарихтан белгілі. Партия сол ерлік ешқашан ұмытылмайтындығын осылайша білдірді. Сонымен бірге, патриоттықтар Ұлы Отан соғысы мен Ауған соғысы ардагерлерінің қазіргі жағдайын айта келіп, оларға үнемі көңіл аударылуы қажеттігін ортаға салды.
Осы ретте партия аула, шағын аудан, көшелерде де кездесулер өткізіп, қарапайым қала тұрғындарымен жүздесіп, насихат жұмыстарын жүргізіп келе жатқанын айта кеткен жөн.
Асқар ТҰРАПБАЙҰЛЫ.