Классикалық музыка майталманының ғасыр тойына арналған айтулы кешке Астана қаласы әкімінің орынбасары Ермек Аманшаев, Әзербайжан Республикасының Қазақстандағы елшісі Рашад Маммадов, ТҮРКСОЙ халықаралық ұйымының бас хатшысы Дүйсен Қасейінов және мәдениет пен өнердің көрнекті өкілдері қатысты. Астана мемлекеттік академиялық филармониясының Симфониялық оркестрі Әзербайжаннан арнайы шақырылған қос дирижер – Мұстафа Мехмандаров пен Муртуза Бюльбюльдің сүйемелдеуінде композитор қолтаңбасына тиесілі атақты «Ләйлі-Мәжнүн» поэмасынан үзінді, «Жеті сұлу» балетінен «Прекраснейшая» және «Вальс» шығармаларын, сондай-ақ «Тропою грома» балетінен №2 сюитаны талғампаз тыңдарман назарына ұсынды.
Түркі кеңістігі қайраткерлері мен айтулы тұлғалаларының мерейтойларын атаусыз қалдырмайтын ТҮРКСОЙ халықаралық ұйымының 2018 жылды Қара Қараевтың жылы деп жариялауы – әуенімен әлемді әлдилеген Әзербайжан классикалық музыкасының саңлағы Қара Қараевтың шығармашылық мұрасының шартарапты шарлап, Жер шарының түкпір-түкпірін жайлаған өнерсүйер тыңдарманға рухани қуаныш сыйлаудың таптырмас мүмкіндігін тарту еткені сөзсіз. Елорда төрінде өткен айтулы концерт аталған тағылымды шараның бір парасы ғана.
Қара Абулфазоғлы Қараевтың музыкалық мұрасы мазмұн жағынан кең ауқымды және жанрлық тұрғыдан жан-жақты. Композитор қиялына қанат бітірген туындылар музыка жанрларының барлығын дерлік қамтиды. Өзінің саналы шығармашылық ғұмырында сазгер 3 опера, дәл сондай есепте балет пен симфония, сондай-ақ көптеген тақырыптық һәм бағдарламалық туындылар мен камералық, аспаптық оркестрлерге және де бірнеше спектакль мен түрлі кинофильмдерге арнап әуен жазды. Қара Қараев шығармашылығының бағыты мен стилі негізінен эмоцияналды жарқындық, драмалық тереңдік және нәзік лириканы өзара сәтті үйлестіре отырып, содан өзіне ғана тән дара тынысын дөп басуымен ерекшеленеді. Композитордың әуен әлеміне ден қойған тыңдарман сазгер қолтаңбасынан әйгілі ақын Низами шығармашылығынан нәр алған шабытты да жарқын шығыс дәстүрінің нәзік иірімдерін жазбай таниды. Ол, әсіресе әуен әміршісінің «Ләйлі-Мәжнүн», «Жеті сұлу» шығармаларының саз сарынында айқын аңғарылады. Тіпті композитор өмірінің соңында жазылған туындылар әуезінде де осы құнар сақталған. Яғни, Қ.Қараев шығармашылығының негізгі тіні, өзегі – халық музыкасының жауһарлары.
«Астана» концерт залының төрінде өткен музыка кешіне жиналған өнерсүйер қауым сөзбен айтып жеткізгісіз ғаламат күйді Астана мемлекеттік академиялық филармониясы Симфониялық оркестрінің орындауында жаһанды сазымен тербеген әйгілі әзербайжан композиторының талғампаз табиғатынан сезініп, бір-ақ деммен өткен концерт шымылдығын қимай жапты. Әзербайжан әуен әлемінің падишаһы – Қара Қараевтың ғасыр тойына арналған салтанатты кештің тағылымы мен мәні де осы бір ғажайып музыканың мінсіз мәнерімен шебер үйлесіп, тыңдаушысын тылсым сырдың тұңғиығына бойлатты.
Назерке ЖҰМАБАЙ,
«Егемен Қазақстан»
