Жерлестері ұйымдастырған еске алу шаралары аясында Рудный қаласындағы ол оқыған бұрынғы мектеп, қазіргі музыка колледжі ғимаратының қабырғасына ескерткіш тақта ілінді. Оның ашылуына облыс және Рудный қаласы басшылығының өкілдері, замандас достары қатысты.
– Қазақстан Республикасы Президентінің Әкімшілігінде жауапты қызметтер атқарып, Парламент Мәжілісіне депутат, екі мәрте төраға болып сайлануы Орекеңе артылған зор сенім мен жауапкершіліктің жеңіл болмағанын аңғартады. Көзі тірі болса ол бүгін 70 жасқа толар еді. «Жақсының аты өлмейді, ғалымның хаты өлмейді» дегендей, Рудный қаласында ілінген ескерткіш тақта Орал Байғонысұлының елі үшін жасаған еңбегін ұмыттырмайды, – деді Қостанай облыстық мәслихатының хатшысы Сайлаубек Есжанов.
Орал Мұхамеджанов жас тәуелсіз елдің заңнамалық базасын нығайтуға еңбек сіңірді. Елбасының сенімді серіктерінің бірі болды. Өзінің білімі мен қажыр-қайратын Қазақстанның гүлденуіне жұмсады. Ол депутат ретінде Қостанайға келген сапары сайын туған жердегі білім ордаларына барып, студент жастармен кездесуге, оларды болашақ білікті маман болуы үшін бағыттауға, пікірлесуге уақыт таба білетін.
Әдетте, О.Мұхамеджановты еске алғанда текті әулеттің тұяғы екені туралы әңгіме қозғалады. Бұл шарада да жерлестері оның бойындағы өнерге жақындық аталарынан келген дарын екенін айтты.
– Орал ағаның атасы Мұхамеджан Өтелбайұлы Арқадағы әншілік мектебінің ірі өкілі болған. Жасында Троицк, Боқырау, Қараөткел, Атбасар жәрмеңкелерінде ән салып, өнер жарыстырған. Оның өзі шығарған сегіз әні Талиға Бекхожинаның «Қазақтың 200 әні» жинағында жарық көрген. Ал әкесі Байғоныс атамыз Қостанай-Торғай өңіріне танымал әнші еді. Орал аға Новосібірде оқып жүргенде классикалық әндер мен опералық арияларды орындап, әншілігімен танылған, – деді музыка зерттеушісі Гүлнәр Әлпейісова.
– Тәуелсіз Қазақстанның құқықтық-заңнамалық іргетасының нығаюына айтарлықтай үлес қосқан Орал Мұхамеджановтың өмірі мен қызметі жастарға үлгі. Жас ұрпақ туған елдің жақсыларын ұмытпауы керек, сондықтан бүгінгі ескерткіш тақтаның ашылуы осы ғимаратта білім алып жатқан жастар және қалалықтар үшін маңызды оқиға саналады, – деді Рудный қаласы әкімінің орынбасары Елена Скаредина. Еңбек ардагері Жұмағали Қасымов Орал Байғонысұлының достыққа адал, адамгершілігі туралы әңгімеледі.
Орал Байғонысұлының жары Шолпан мен қызы Зухра ескерткіш тақтаның ашылуына қатысып, отбасы атынан жерлестеріне ризалығын білдірді.
Нәзира ЖӘРІМБЕТ,
«Егемен Қазақстан»
Қостанай облысы, Рудный қаласы
