Жолдың ашылу салтанатына жақын маңдағы ауыл тұрғындары, жергілікті және аймақтық әкімдік өкілдері, сондай-ақ алғашқы символикалық автоколоннаны қарсы алған «Қазавтожол» оператор-компаниясы қатысты. Жаһандық ауқымдағы бұл жобаның екінші лотын тапсыру елдің аса маңызды экономикалық маңызы бар «Батыс Еуропа ‒ Батыс Қытай» халықаралық көлік дәлізінің тағы бір дайын учаскесін алғанын білдіреді.
«Асумен келе жатқан ескі жол екінші категорияға жатады, дейді «Казахдорстрой» дивизионының директоры Зағапар Дощанов. – Бұл асуда ол көліктің өсіп келе жатқан ағыны үшін қауіпсіз емес, сонымен қатар әсіресе қысқы уақытта бұл жерде үнемі кептелек орын алады».
I Б санаттағы жаңа жол енді асуларды айналып өтіп, көлік жүргізушілерге уақытты үнемдеп қана қоймай, өздерін қауіпсіз және жайлы сезінуге мүмкіндік береді. Оның басым бөлігі бетонды, бірақ тік беткейлері мен бұрылыстары асфальтталған. Бұл, әсіресе қысқы уақытта көлік дөңгелегінің жолмен біркелкі жанаса қозғалуына мүкіндік береді.
Ұзындығы 40 шақырымдық екі жолақты жолдың аяқталған учаскесі толық жиынтықта тапсырылды: бөлу жолағы, автокөлік тұрағына арналған алаңдар, электр беру желілері, автобус аялдамасы, жолайрықтар, жол-патрульдік бекеті бар. Жолдың ені – 7,5 метр. Қозғалыстың есептік жылдамдығы – 100-120 км/сағ.
Климаттың қатты ыстық әрі үздіксіз жел соғып тұратыны ескерілгендіктен, жұмыстар өткен жылдан бастап жүргізілді. Табиғат бірнеше рет жұмысқа кедергі келтіргенімен, ізденгіш құрылысшылар тығырықтан шығар жол тауып, объектіні уақытында пайдалануға берді.
«Бетонның өзіне тән ерекшеліктері бар, ‒ деп атап өтті жоба жетекшісі Шатбек Байсынов, ‒ егер оны +25 градустан жоғары температурада төсесе, ол тым тез кебеді және біркелкі болмайды. Желдің де жұмысқа кедергі келтіретінін жоғарыда айттым, сондықтан ол секундына 7-10 м жылдамдықпен соққан кезде біз жұмысты тоқтатып отырдық».
Алайда тәжірибелі командаға табиғат қиыншылықтары еш тосқауыл бола алмады. Оңтүстіктің жылы климатын пайдалана отырып, мұнда жұмыстар екі ауысымда жүргізілді, бұл қажетті қарқын мен нәтижені қамтамасыз етті.
Естеріңізге сала кетейік, өткен жылы «Казахдорстрой» дивизионы осы трассаның 40 шақырымдық бірінші лотын пайдалануға берген болатын.
Хамит ЕСАМАН,
«Егемен Қазақстан»
Жамбыл облысы
