Жыр додасына Астана, Қарағанды, Семей, Павлодар, Тараз, Екібастұз және Баянауыл ауданынан 12 ақын қатысып, ел тәуелсіздігі, рухани жаңғыру тақырыптарын тілге тиек етті.
«Іс-шараның негізгі мақсаты – Тәуелсіздік құндылықтары мен идеяларын өнер арқылы насихаттау. Біз аталған ақындар аламанын осымен үшінші жыл қатарынан ұйымдастырып келеміз. Жыл сайын әр өңірдің шайырларын шақырып шахталы шаһарда бастарын қосамыз. Олар да тыңғылықты дайындықпен келіп, өркендеген өңірімізді өлеңге қосып, көрерменнің көңілін көтеріп кетеді. Жыл сайын өткізіп келе жатқан жыр додасын алдағы уақытта да жалғастыра береміз», деді «Атамұра» мәдениет орталығының директоры Нұрсұлу Еркебайқызы.
Қазылар алқасының шешімімен бас жүлдені Рауан Қайдаров (Екібастұз), бірінші орынды Аруна Керімбек (Тараз), екінші орынды Аспанбек Шұғатаев (Баянауыл) және үшінші орынды Қуанышбек Шарманов (Павлодар) иеленді. Жеңімпаздарға ақшалай сыйлықтар мен дипломдар табысталды.
Ұларбек НҰРҒАЛЫМҰЛЫ,
«Егемен Қазақстан»
