Астанадағы кәсіпқой бокс кешін ашқан Асхат Уәлиханов украиналық қарсыласы Ярослав Юровпен алты раунд айқасып, төрешілердің бірауыз шешімімен басым түсті. Ал Канададан келген Абылайхан Құсайынов украиналық Максим Морозды үшінші раундта техникалық нокаутпен тізе бүктірді. Айдар Шәрібаев Украина спортшысы Артем Айвазидимен алты раунд жұдырықтасып, төрешілердің шешімімен жеңіске жетті. Айдар қарсыласын екі рет нокдаунға жібергенін айта кетейік.
Ең ауыр салмақтағы Руслан Мырсатаев украин Павел Кроленкомен айқасып, қарсыласынан төрешілер шешімі бойынша басым түссе, Қытайда туып-өскен қандасымыз Елшат Нығматоллаұлы жерлесіміз Мардан Берікбаевпен жұдырықтасып, төрешілер шешімі бойынша тең түсті.
Әли БИТӨРЕ,
«Егемен Қазақстан»
