Өйткені визаны электронды ресімдеу – көп шаруаны жеңілдетуге ықпал етеді. Сондықтан елдегі виза берудің қолданыстағы тәртібіне өзгерістер енгізіліп отыр. Электронды виза іскерлік, туристік және емделу мақсатында Қазақстанға келетін шетелдік азаматтарға Ішкі істер министрлігінің көші-қон қызметі бөлімшелерінде белгіленген тәртіппен ресімделіп, қазақстандық тараптың шақыруы негізінде беріледі. Соның арқасында заң бұзушылықтың алдын алу мен азайту жұмыстары жүйелі жүргізілетін болады.
Қолында жарамды электронды визасы бар шетелдік Қазақстан Республикасының аумағына тек қана Астана және Алматы қалаларындағы халықаралық әуежайлардың бақылау пункттері арқылы кіріп-шыға алады, делінген Сыртқы істер министрлігінің сайтында.
Нәтижесінде туристік электронды визалар 117 елдің, ал іскерлік және емделу визасы 23 елдің азаматтарына берілмек. Бұл отандық демалыс орындары мен емдік-сауықтыру орталықтары үшін де пайда әкелуі тиіс. Мұның арқасында қазақ еліне келетін шетелдіктердің саны еселеніп, туризм саласына ықпалы етуі мүмкін.
Электронды бұл құжат тек визаны алушы үшін ғана жарамды және онымен бірге жүретін тұлғаларға қолданылмайды. Айта кету керек, төленген консулдық алымдар қайтарылмайды. Виза мәселесін шешу қолайлы әдістермен шешілгенімен оны алудағы тәртіптер қатаң сақталатыны сөзсіз. Сол себепті виза алушының ұсынған паспорты түпнұсқа және иесінікі екендігіне күмән келтірмейтіндей болуы шарт. Сондай-ақ шетелдік азаматтың құжатында кемінде 2 таза бет болғаны жөн. Оның жарамдылық мерзімі визаның қолданылу мерзімінен бұрын немесе 3 айдан бұрын аяқталмауы керек. Осындай талапқа сай шетелдік қана электронды визаға қол жеткізбек.
Қабылдаушы тұлғалар келіп кетушілер туралы көші-қон қызметі органдарына олар келген күннен бастап үш жұмыс күні ішінде хабарлап отыратын болады.
Ал электронды визаны ресімдеу алгоритмі мен визаны алатын елдер тізімі СІМ сайтында көрсетілген.
Жанболат КЕНЖЕҒҰЛ,
«Егемен Қазақстан»
