Акция аясында «достық дастарқанына» жиналған түрлі этнос өкілдерінің ақсақалдары мен ел ағалары Астанадағы «Қоғамдық келісім» үйінде бас қосты. Жиналған қонақтар үшін қазақ халқының салт-дәстүрінен көріністер қойылды. Ақ жаулықты әжелер «Бесікке салу», «Тұсау кесу» рәсімдерін әуезді әнмен әрлеп, сахналық қойылым ұсынды. Мұның бәрі республикалық «Сарқыт» қайырымдылық акциясына келушілердің көңіл күйін көтеріп, ұлттық құндылықтарымызды дәріптеу үшін жасалып отыр. Шара барысында «Сарқыт» сөзінің мән-маңызы мен мағынасы жайлы айтылып, қайырымдылық шараға негіз болу себебі түсіндірілді. Содан соң ҚХА-ның «Жаңғыру жолы» републикалық жастар қозғалысының белсенділері көмекке мұқтаж отбасыларға сарқыт ретінде азық-түлік дорбаларын таратты. Айта кету керек, бұл акция жыл бойы еліміздің әр өңірінде жалғасатын болады. Ассамблея мүшелерінің айтуынша, мұндай жұмыстардың нәтижесі жақсы.
– Осы жоба аясында 2018 жылдың өзінде 8 700 іс-шара ұйымдастырылып, 2,5 млрд теңге көлемінде 400 мыңнан астам адамға көмек көрсетілді. 2017-2018 жылдар аралығында ҚХА-ның «Жомарт жан» төсбелгісімен 78 демеуші марапатталды. Ал бүгінгі акция 2019 жылдағы алғашқы ұйымдастырылып отырған іс-шарамыз. Мұндай жаңа форматтағы жүйелі қайырымдылық жобасы бұған дейін Атырау қаласында өткен меценаттар съезінде қабылданған болатын, – дейді ҚХА Төрағасының орынбасары Л.Прокопенко.
Жыл бойы әр айда әртүрлі атаумен еліміздің барлық қалаларындағы Достық үйлері базасында дәл осы қайырымдылық шаралары жалғасады. Күнтізбеде әлі де «Сыбаға», «Шашу», «Асар», «Қамқор» сияқты тағы басқа атаумен қайырымдылық ісі кезек күтіп тұр. Демек, еліміздегі жағдайы төмен отбасыларға қол ұшын созу мүмкіндігі үздіксіз жалғаса бермек.
Жанболат КЕНЖЕҒҰЛ,
«Егемен Қазақстан»
