Қарағанды облысында мектеп жанындағы интернаттардың көп жылдан бері жөндеу көрмей, жүдеу күй кешіп келгені күн тәртібінде өткір тұрған мәселелердің бірі-тұғын. Дегенмен, өткен жылы қолға алынған жұмыстардың нәтижесіне қарап, бүгінде аталған мәселенің түпкілікті шешім тапқанын нық сеніммен айтуға болады.
Таяуда Осакаров ауданында жұмыс сапарымен болған облыс басшысы Ерлан Қошанов өңірдегі барлық интернаттың жөндеуден өткенін мәлімдеді.
– Президенттің тапсырмасы бойынша облысымыздағы интернаттардың барлығын қалпына келтірдік. Олар көптен бері жөндеуді қажет еткен болатын, сондықтан біз бірінші кезекте осы мәселеге көңіл аудардық, – деді Е.Қошанов.
Қарағанды облысында орта мектептер жанында барлығы 21 интернат жұмыс істейді. Бүгінде олардың 12-сі күрделі жөндеуден, қалғаны ағымдағы жөндеуден өткен.
Осакаров ауданында болғанында облыс басшысы №12 жалпы білім беру мектебінің жанындағы интернаттың тыныс-тіршілігімен танысты. Бір жыл бұрын апатты жағдайда болған мекемеге қазір 114 млн теңгенің жөндеу жұмыстары жүргізілген.
– Бұл жерде менің үш балам тұрып жатыр. Қазір көңілімде алаң жоқ, себебі мұнда үйдегідей жағдай жасалған. Ғимарат жайлы және жылы. Өскелең ұрпаққа үлкен көңіл бөліп жатқаны үшін Президентімізге алғысымды білдіремін, – дейді интернат оқушысының анасы Оксана Ковалева ағынан жарылып.
Сапар барысында өңір басшысы аудан орталығындағы балалардың бос уақыттарын қалай өткізетіндігін де назардан тыс қалдырмады. Осакаров аудандық Білім бөлімінің басшысы Айнагүл Ақманбетованың айтуынша, оқушылар бос уақытының көбін осындағы қосымша білім беру орталығында өткізеді екен. Мұнда олар музыкалық үйірме, қуыршақ театры және басқа да көптеген секцияға қатысады. Алдағы уақытта мекемені жаңғыртып, үйірмелердің санын көбейту де жоспарда бар.
Қайрат ӘБІЛДА,
«Egemen Qazaqstan»
Қарағанды облысы
