Кеше айтулы жарыста өнер көрсететін барлық спортшылардың есімдері белгілі болды. Осы кештің басты жекпе-жегінде жартылай ауыр салмақтағы польшалық Ян Блахович пен бразилиялық Тьяго Сантос күш сынасады.
Өзге кездесулер Джон Додсон – Пётр Ян, Стефан Струве – Маркос Рожерио де Лима, Лиз Кармуш – Люси Пудилова, Даниэл Теймур — Крис Фишгольд, Дамир Хадзович – Марко Поло Рейес, Рустам Хабилов – Диего Феррейра, Гиан Виланте – Михал Олексийчук, Магомед Анкалаев –Дарко Стошич, Гилиан Робертсон – Вероника Мацедо, Карло Педерсоли –Дуайт Грант арасында өтеді.
28 жастағы Дамир Исмағұлов үшін бұл UFC-дегі екінші бәсекесі. Алғашқысын Австралияда өткізген қазақ жігіті жергілікті спортшы Алекс Горджесті ұпай санымен ұтқан болатын. Оның алдында қандасымыз М-1 нұсқасы бойынша чемпиондық белбеуді иеленді. Дамирдің қарсыласы да өте мықты. 25 жастағы Джоэл Альварес 16 жекпе-жек өткізіп, 15 мәрте жеңіске жетті. Сол бәсекелердің барлығын ол мерзімінен бұрын аяқтаған.
Ғалым СҮЛЕЙМЕН,
«Egemen Qazaqstan»
