Мемлекеттік сыйлықтың иегері Несіпбек Айтұлы төрағалық ететін қазылар құрамында белгілі ақын, Қазақстан Жазушылар Одағы төрағасының орынбасары Бауыржан Жақып, Қазақстан Жазушылар одағы Атырау филиалының төрағасы Қойшығұл Жылқышиев, Қазақстанның құрметті журналисі Нұртөре Жүсіп, ақындар Ахметжан Өзбеков, Шолпан Қыдырниязова, Дариға Мұштанова сөз додасына төрелік етті.
«Рухани жаңғыру» бағдарламасы мен Елбасының «Ұлы даланың жеті қыры» мақаласындағы ұлттық құндылықтарды дәріптеу, «Жастар жылы» аясындағы жарқын болашақты жырлау мақсатында өткен «Азаттықтың ақ таңы» атты республикалық ақындар айтысына Түркістан облысынан Бекарыс Шойбеков, Астана қаласынан Жандарбек Бұлғақов пен Сұлужан Таубалды, Алматы қаласынан Рүстем Қайыртайұлы мен Хазірет Бердіхан, Қарағанды облысынан Мақсат Аханов пен Төлеген Жаманов, Қызылорда облысынан Мейірбек Сұлтанхан мен Ержан Әміров, Көкшетаудан Әлібек Серғалиев, Павлодардан Рауан Хайдаров, Жамбыл облысынан Есет Досалы, Шымкенттен Біржан Байтуов, Маңғыстаудан Арғынбек Қалбай, Атырау облысынан Амангелді Панабердиев келді. Ал «алаң иелері» Батыс Қазақстан облысынан Жансая Мусина, Мұрадым Мирланов, Эльдар Ықсанов, Айнабек Бисенғалиев және Орынбек Меңдіқұловтар қатысты.
Батыс Қазақстан облысы әкімдігі мен облыстық мәдениет басқармасының қолдауымен, Қадыр Мырза Әли атындағы мәдениет және өнер орталығының ұйымдастыруымен өткен тартысты сайыста 20 ақынның арасынан Бас бәйге Рүстем Қайыртайұлына бұйырды. Ол 1 млн теңгенің сертификатына ие болды.
Айтыстың І орын жүлдесі (700 000 тг) – Төлеген Жаманов пен Хазірет Бердіханға, ІІ орын (500 000 тг) – Біржан Байтуов пен Рауан Хайдаровқа тиесілі болды. Қазылар алқасы айтыстың әрқайсысы 400 мың теңгелік ІІІ орын бәйгесіне - Бекарыс Шойбеков пен Жандарбек Бұлғақовты лайық деп тапты. Арнайы жүлдені (250 000 тг) – Әлібек Серғалиев, Мейірбек Сұлтанхан, Сұлужан Таубалды бөлісті. Қалған 10 ақын шабыттандыру сыйлығы мен 200 мың теңге көлемінде қаржылай жүлдемен марапатталды.
Қазбек ҚҰТТЫМҰРАТҰЛЫ,
«Egemen Qazaqstan»
Суреттерді түсірген Темірболат ТОҚМӘМБЕТОВ
Батыс Қазақстан
