«Nur Otan» партиясы Төрағасының бірінші орынбасары Мәулен Әшімбаев жоба аясында қоғамдағы өзекті мәселелерді дер кезінде әрі тиімді шешу үшін қоғамдық қабылдау бөлмелері «жедел әрі бір жерде» қағидасымен жұмыс істейтінін жеткізді. «Жобаны жүзеге асыру мақсатында тек ірі қалалардағы ғана емес, барлық филиалдарымыздағы қоғамдық қабылдау бөлмелерінің әлеуетін толық пайдаланамыз. Өйткені біздің басты міндетіміз – халықтың мәселесін тиімді шешіп беру», деді ол.
Партиялық жобаның басты мақсаты – азаматтардың өзекті мәселелерін жедел шешу және әлеуметтік жоспардың өткір әлеуметтік проблемаларына көмек көрсету. М.Әшімбаевтың айтуынша, «Халыққа көмек» партиялық жобасы арқылы қоғамдық қабылдау бөлмелері Елбасының әлеуметтік салаға қатысты тапсырмаларын орындау барысында мемлекеттік органдардың, үкіметтік емес ұйымдардың және бизнес қауымдастықтың қызметтерін үйлестіруші рөлді атқарады.
«Nur Otan» партиясы Республикалық қоғамдық қабылдау бөлмесінің басшысы Бақыт Темірова жобаны іске асыру тетіктеріне тоқталды. Бұл тұрғыда азаматтар өздерін мазалаған сұрақтар мен мәселелерін кез келген партия филиалдары, онлайн түрде, яғни партияның www.nurotan.kz
ресми сайты, 109 iKomek орталығы, партияның әлеуметтік желілердегі ресми парақшалары, партияның 88000804441 Call Center-і, 87008004441 нөміріндегі WhatsApp желісі арқылы өтініш беріп, көмек ала алады.
Б.Темірованың мәлімдеуінше, аталған жоба туралы съезде сөз болғаннан кейін 3216 азамат қоғамдық қабылдау бөлмелеріне өтініш беріп үлгерген. Оның 1075-і тұрғын үймен қамтамасыз ету, 233-і жұмыспен қамту, 86-сы балаларды оқыту, 57-сі балаларды емдеу және 58-і мүгедектерді оңалту мәселелерімен хабарласқан.
«Nur Otan» партиясы Астана қалалық филиалы төрағасының бірінші орынбасары Бақыт Сапаров жоба аясында халықтың мәселелерін шешуде әлеуметтік желіні тиімді пайдалануға шақырды. «Азаматтар көкейдегі сауалдарын, мәселен, еңбекақы, алименттің төленбеуін немесе тиісті көмек, анықтамалардың берілмей жатқанын әлеуметтік желідегі парақшаларында жазса, өтініштер негізінде заңға сәйкес әр мәселенің шешімін табуға тырысамыз. Бұл біздің әлеуметтік желілердегі белсенділіктің бір бағыты болады», деді ол.
Айдана ШОТБАЙҚЫЗЫ,
«Egemen Qazaqstan»
