У.Мозер әр жылдары АҚШ мемлекеттік хатшысының орынбасары қызметін атқарған, сонымен бірге Американың Украина, Қазақстан, Мысыр, Суринам және Малидегі елшіліктерінде жұмыс істеген, АҚШ-тың Молдовадағы елшісі лауазымында болған.
ТМД кеңістігіндегі қызметтері әсер еткен болар, Уильям Мозер орыс тілін меңгерген екен.
Қазақстан Президентіне сенім грамотасын тапсыру салтанатынан кейін журналистер алдына шыққан елші осыдан 20 шақты жыл бұрын Алматыдағы елшілікте жұмыс істегендігін және Қазақстанға асқан ықыласпен оралғандығын, сонымен бірге Қазақстан Президенті Қасым-Жомарт Тоқаевқа сенім грамотасын тапсыру өзіне зор мәртебе екендігін атап өтті.
– Менің Қазақстанға алғаш келген және соңғы болған уақытымның аралығында Қазақстан зор табыстарға қол жеткізгендігін атап өткім келеді, – деген У.Мозер елорданың бірегейлігі мен заманауи архитектуралық құрылымына тәнті болғандығын жасырмады.
– Қазақстанның өткен өркендеу жылдары мені қатты таңғалдырды. Осы уақытта халықтың жағдайы жақсарып, әл-ауқаты арта түскен. Біз Қазақстанмен арадағы кең стратегиялық әріптестікті жоғары бағалаймыз, – деді АҚШ елшісі.
Сонымен қатар Қазақстанның Тұңғыш Президентінің мемлекеттер арасындағы байланысты нығайтудағы жетістіктеріне ерекше тоқталды.
– Біз Нұрсұлтан Назарбаевтың стратегиясын, ядролық қаруды таратпау бойынша Қазақстанды жаһандық көшбасшы қылудағы еңбегін жоғары бағалаймыз. Бұл міндеттемелер біздің әріптестігіміздің негізі болып қала береді. Біз, сонымен қатар Қазақстанның америкалық компаниялар тарапынан келетін коммерциялық инвестицияларға ашықтығын атап өткіміз келеді, – деді АҚШ елшісі.
Дипломат өз сөзінде Қазақстанның тек Орталық Азия ғана емес, сонымен бірге халықаралық аренада көшбасшы мемлекетке айналғандығын атап өтті. Оның ішінде еліміздің көптеген халықаралық процестердегі, БҰҰ Қауіпсіздік Кеңесіндегі белсенділігі, барлық жаһандық кикілжіңдердің бейбіт шешілуінің жақтаушысы ретіндегі рөлін жоғары бағалайтынын айтты.
АҚШ елшісі сөзінің соңында: «Қазақстанның Тұңғыш Президенті Нұрсұлтан Назарбаевқа бірнеше ондаған жыл даналықпен елге басшылық жасағаны үшін құрметім мен ризашылығымды білдіргім келеді. Ол ең қиын кезеңдердің өзінде Қазақстанды тәуелсіздікке, егемендікке, гүлденуге бастады. Құрметті Президент Қасым-Жомарт Тоқаевпен бірлескен жұмысымыз жемісті боларына сенім артамын», деп ағынан жарылды.
* * *
Сондай-ақ Мемлекет басшысы Қасым-Жомарт Тоқаев Қытай Халық Республикасының Қазақстандағы Төтенше және өкілетті елшісі Чжан Сяомен кездесті.
Кездесу барысында Қасым-Жомарт Тоқаев Қазақстан мен Қытай арасындағы қарым-қатынастардың қарқынды дамып келе жатқанына тоқталып, екі ел халықтарының игілігі жолындағы байланыстардың одан әрі нығая түсетініне сенім білдірді.
Төтенше және өкілетті елші Чжан Сяо Қасым-Жомарт Тоқаевқа Қазақстан Республикасының Президенті лауазымына кірісуіне байланысты Қытай Халық Республикасының Төрағасы Си Цзиньпиннің құттықтауын жеткізіп, достық пен стратегиялық серіктестік рухындағы екіжақты ынтымақтастықты дамыта түсуге күш салатынын айтты.
Серік ӘБДІБЕК,
«Egemen Qazaqstan»
