– Қарағандыда Fashion индустриясын дамыту көптен бері ойымда жүрген идея еді. Бүгінде бұл саланың маңызды әрі қажет екеніне жұрттың да көзі жете бастады. Пікірлестерім мен қолдаушыларымның барлығына қуаныштымын. Ал аталған байқаудың жаңа деңгейге шыққаны – біз таңдаған жолдың дұрыстығын көрсетеді, – дейді жоба авторларының бірі Ирина Нечаева.
Байқаудағы әшекейшілер сайысында қарағандылық Ольга Целлерге тең келер ешкім болмады. Қолөнер шеберінің кеншілер қаласының ерекшелігін көрсететін топтамасында тас көмір мен табиғи гүлдер үйлесім тауып, көздің жауын алатын алуан түрлі әшекей бұйымдарына айналған. Бас жүлдеге ие болған жеңімпаз енді Мәскеу қаласында өтетін халықаралық байқауда бақ сынайтын болады.
Ольганың негізгі мамандығы экономист. Безендіру дизайнымен төрт жылдан бері айналысып келеді.
– Барлығы хоббиден басталды. Мен өзіме және құрбыларыма арналған аксессуарлар жасадым. Содан кейін шайыр үстіне табиғи гүлдерден әшекей жасау технологиясын меңгердім. Хоббиім келе-келе кәсібіме айналды. Қазір коллекциялармен жұмыс істеймін және өзімнің бірегей стилімді жасауға тырысып келемін, – дейді Ольга Целлер.
Ал «Үздік дизайнер» аталымы бойынша бас жүлде елордалық шебер Камиля Сүлейменоваға бұйырды. Жеңімпаздың киіз өңдеу ісіне заманауи леп беріп, оны жаңа қырынан таныта білген шеберлігі қазылар алқасынан жоғары баға алды.
ҚАРАҒАНДЫ
