Қазіргі уақытта Батыс-2 және Батыс-3 жалпы ауданы 312 мың шаршы метрді құрайтын 3000 пәтерге арналған 32 үйдің құрылысы жүргізілуде.
Облыс әкімі жауапты мемлекеттік органдардың басшыларына құрылыс жұмыстарының қарқынын үнемі қатаң бақылауда ұстауды тапсырып, тұрғын аудандарын жақсарту жөнінде нақты тапсырмалар берді.
«Сапа ерекше назарға алынады. Өкінішке орай, тұрғындардың тарапынан тұрғын үйдің сапасына байланысты шағымдары бар. Бұндай енді болмауы керек. Тәртіп бұзушыларға қатаң шара қолданылатын болады. Қалалық билікке ең алдымен - мектептер, балабақшалар, медициналық мекемелерге әлеуметтік инфрақұрылымды қамтамасыз етуді қадағалауды тапсырамын. Пайдалануға дайын жаңа үйлерде алғашқы тұрғындардың орналасуы кезінде аулалар абаттандырылып, жолдар мен тротуарлар төселіп, балалардың ойын алаңдары орнатылуы және автотұрақтарда орындардың саны жеткілікті болуы қамтамасыз етілуі керек», - деп атап көрсетті облыс басшысы.
Биылдан бастап Батыс-2 және Батыс-3 тұрғын аудандарында екі деңгейлі аулаларды салу жоспарлануда, жертөлесі паркингпен жабдықталып, үстіңгі қабат балалар ойын алаңдары болады.
Оңдасын Оразалин басқа да жаңалықтарды енгізу қажеттігін атап өтті. Облыс әкімінің ойынша, шағын аудандардағы жаңа ғимараттар кескінсіз және біртекті ұқсас. Ол үйлер мен аймақты жобалауда заманауи ақылды технологияларды және ерекше архитектуралық жаңалықтарды енгізуді, мүмкіндігінше көбірек саябақ аумақтарын жабдықтауға шақырды.
Әзірлеушілермен кездесу барысында облыс әкімі олардың өтініштері мен ұсыныстарын тыңдап, аз қамтылған және көпбалалы отбасыларға арналған тұрғын үймен қамтамасыз ету, мемлекеттік тұрғын үй бағдарламаларын жүзеге асыру мәселелерін талқылады.
