Бүгін – Олимпиада күні
Сенбі, 19 мамыр 2012 7:36
Бүгін елімізде Ұлттық олимпиадалық комитет, Спорт және дене тәрбиесі істері жөніндегі агенттік, Астана және Алматы қалалары мен облыс әкімдіктерінің ұйымдастыруымен дәстүрлі «Олимпиада күні» өтеді.
«Дүниежүзілік Олимпиада күні» – елімізде бірнеше жылдан бері өткізіліп келе жатқан спорттық шара. Астана қаласында бұл іс-шара Қ.Мұңайтпасов атындағы Орталық стадионда өткізіледі. Оған барлық жастағы азаматтар қатыса алады. Осыған орай әртүрлі жастағы қатысушылар үшін жеке жүгірістер ұйымдастырылып, мүмкіндіктері шектеулі азаматтарға арнайы жүлделер үлестіріледі.
Сенбі, 19 мамыр 2012 7:36
Бүгін елімізде Ұлттық олимпиадалық комитет, Спорт және дене тәрбиесі істері жөніндегі агенттік, Астана және Алматы қалалары мен облыс әкімдіктерінің ұйымдастыруымен дәстүрлі «Олимпиада күні» өтеді.
«Дүниежүзілік Олимпиада күні» – елімізде бірнеше жылдан бері өткізіліп келе жатқан спорттық шара. Астана қаласында бұл іс-шара Қ.Мұңайтпасов атындағы Орталық стадионда өткізіледі. Оған барлық жастағы азаматтар қатыса алады. Осыған орай әртүрлі жастағы қатысушылар үшін жеке жүгірістер ұйымдастырылып, мүмкіндіктері шектеулі азаматтарға арнайы жүлделер үлестіріледі.
Жарыстар сағат 10.00-де басталады. Оның бағдарламасында 5-10 жастағы балалар үшін «Олимпиадалық жарыстар» атты тақырыпқа асфальттағы суреттердің байқауы, үлкен сыныптағы оқушылар мен студенттер үшін «2012 жылғы Лондондағы олимпиялық ойындар» олимпиадалық викторина, ұлттық спорт түрлерінен, дротиктер лақтырудан, үстел теннисінен, ойыншық садақтан ату бойынша жарыстар өткізіледі. Сонымен бірге, Парламент депутаттары, Олимпиада чемпиондары мен БАҚ өкілдерінің арасында 400 метр қашықтыққа жүгіру жарысын өткізу жоспарлануда.
Олимпиада күнінің жеңімпаздары мен жүлдегерлері Ұлттық олимпиадалық комитеттің естелік сыйлықтарымен, жарыстар демеушілерінің жүлделерімен және Олимпиада символикасы бар майкалармен марапатталады. Ал жақсы жүгірген әрбір қатысушы Халықаралық олимпиадалық комитеттің президенті Жаке Роггенің қолтаңбасымен Олимпиадалық күнге қатысушының сертификатын алады. Сонымен бірге, осы күні Олимпиадалық комитеттің серіктестері «Coca-cola» және «Proctor&Gamble» компаниялары өздерінің бағдарламаларын ұсынып, қатысушыларға өз өнімдерін тегін таратады.
Олимпиада күнін өткізудің тарихына келсек, ол 1948 жылдың қаңтарында ХОК 42-ші сессиясында Дүниежүзілік Олимпиада күнін жыл сайын өткізу туралы қабылдаған шешімінен кейін өткізіліп келеді. Алғашқы Олимпиада күні 1948 жылдың 23 маусымында ұйымдастырылыпты. Қазақстанда өзге елдермен салыстырғанда Олимпиадалық күн қалыптасқан дәстүр бойынша ертерек басталады.
Дастан КЕНЖАЛИН,
«Егемен Қазақстан».
