Таиландта ерлер мен әйелдер арасындағы бокстан Азия чемпионаты өз мәресіне жетті. Онда 81 келіге дейінгі салмақ дәрежесінде АОСК-ның спортшысы, халықаралық дәрежедегі спорт шебері Б. Нұрмағамбет чемпион атанды.
Шешуші кезеңде армияшы Филиппиннен келген Джон Нобель Марвинмен кездесті. Жекпе-жек тартысты болды. Алайда, тартыс кезінде қазақстандықтың үстемдігі айқын байқалды. Қорытындысы бойынша төрешілер бірауыздан шешім қабылдап, АОСК-ның спортшысы жеңімпаз атанды. «Қарулы Күштердің намысын қорғағанымды мақтан тұтамын. Бізде спортпен шұғылдану және нәтижелерге қол жеткізу үшін барлық жағдай жасалған. Аталмыш Азия чемпионаты мен үшін алғашқы болды. Ендігі менің мақсатым бокстан әлем чемпионы болу. Әлем чемпионатында жеңіске жету үшін мен барлық ірі сайыстарға қатысуға тырысатын боламын», деді спортшы.
Биыл әлемнің 39 елінің өкілі турнир қатысушылары атанды. Б.Нұрмағамбеттен басқа Қарулы Күштердің намысын әлем және Азия чемпионаттарының жеңімпаздары мен жүлдегерлері А. Мұзапаров (52 кг), кіші сержант К. Ерәлиев (56 кг), А. Шымбергенов (69 кг) және Р. Волосенко (60 кг) қорғады.
