Форумға мемлекеттік тілді жетік меңгерген этнос өкілдері мен облыстық ассамблея құрылымдары, этномәдени бірлестік төрағалары мен мүшелері және белсенді жастар қатысты.
Жиында сөз алған облыстық «Славяне» қоғамдық-мәдени орталығының мүшесі Елена Павлова: «Елбасы өзі ұсынған кандидатура – ол елдегі саяси бағыттың сабақтастығы. Елдегі алға қойған стратегиялық мақсаттардың бәріне жететін жолдың біреу екендігі және соған тез жететініміздің кепілі есептеледі. Бір тудың астында, бір мақсатты ұстанып өмір сүріп жатқандықтан әрбір саяси оқиғаға аса мән береміз. Елдің болашағы үшін өз таңдауымызды жасайтын боламыз», – деді.
«Кезектен тыс президенттік сайлау халықты топтастыру жолындағы патриоттық акт болып, экономиканы тұрақтандыруға, елдің қарқынды дамуы мен азаматтарымыздың игілігінің түйінді мәселелерін шешу үшін қажетті азаматтық татулықты, әлеуметтік тұрақтылықты қамтамасыз етуге қуатты серпін береді», деді Nur Otan партиясының облыстық «Жас Отан» жастар қанатының төрағасы Талғат Тілес.
Сондай-ақ облыстық «Жаңғыру жолы» ЖҚ төрағасының орынбасары, облыстық корей жастар қозғалысының төрайымы Светлана Пак, «Славяне» қоғамдық-мәдени орталығының мүшесі, облыстық «Жаңғыру жолы» ЖҚ төрағасы Артем Кошман Қазақстан Республикасы Президентінің кезектен тыс сайлауының өткізілуінің маңыздылығына тоқталып, жастарды сайлауға белсенді қатысуға шақырды.
«Көпұлтты Қазақстан – біздің бақытымыз» деген сөзді Қазақстанның Тұңғыш Президенті – Елбасы Нұрсұлтан Әбішұлы Назарбаев үнемі айтып келеді. Оған үлкен себеп бар. Тағдырлы сәт – Қазақстан өз алдына тәуелсіздігін алар тұста қазақтар өз елі, өз жерінде қырық пайызға да жетпейтін. Сол кезде осы жастардың ата-бабалары, әке-шешелері жан-жаққа бұра тартпай біртұтас Қазақстанның іргелі ел болуын қалап, бір тудың астынан табылды.
Енді олардың балалары да Қазақстан Президентін сайлау науқанында ел келешегі үшін жұмылған жұдырықтай бір болуды қалап отыр.
Қызылорда облысы
