Турнирде аудандық және қалалық іріктеулерде финалға шыққан 32 балуан бақ сынады. Жоғары деңгейде ұйымдастырылған жарыста әрбір балуан облыс деңгейінде барыс атануға барын салды. Дегенмен, кілең «сен тұр, мен атайын» дейтін балуандардың арасынан бабы мен бағы келіскен түркістандық Бейбарыс Әбдіғали бас жүлдені жеңіп алып, «Түркістан барысы» атағын иемденді. Турнир жеңімпазына арнайы белбеу, кубок және диплом, сондай-ақ шардаралық спорт жанашырларының демеушілігімен алынған темір тұлпардың кілті салтанатты жағдайда табыс етілді. Турнирде ІІ орынды иеленген Кентау қаласының балуаны Дархан Жамалханға 300 000 теңгенің, ІІІ орын иеленген отырарлық Сабыржан Әбілдаұлына 100 000 теңгенің сертификаты берілді. Ал іріктеу байқауында шебер қимылдарымен көзге түскен сарыағаштық Мұхтар Әбдімәлік «Көрермен көзайымы», бәйдібектік Ерназар Сіргебай «Жеңіске деген жігері үшін» аталымдары бойынша марапатталды.
«Түркістан барысы» атанған Бейбарыс Әбдіғали мен ІІ орынды иеленген Дархан Жамалхан енді республикалық турнирде облыс намысын қорғайтын болады.
