Өмірлік жары Алмагүл Әміреновамен осы оқу орнының қабырғасында танысып, көңіл жарастырып, шаңырақ құрды. «2017 жылы оқуды бітіріп, Көші-қон бағдарламасына кезекке тұрып, пәтер жалдауға субсидия алдық. 2018 жылы баспаналы болдық. Қазір өзіммен бірге туған інім Ұлан «Қазцинкте» жұмыс істеп жатыр. Риддерде тұрып жатқанымызға 5 жылдай уақыт болды. Үйреніп қалдық. Ел жаққа барып тұрамыз», дейді Мақсұт.
2013 жылдан бері жұмыс күші мол, халқы тығыз қоныстанған өңірлерден (Алматы, Қызылорда, Жамбыл, Түркістан, Маңғыстау облыстары және Шымкент қаласы) Шығыс Қазақстанға, оның ішінде Риддер қаласына еңбек ресурстарын тарту жұмыстары белсенді жүргізіліп жатқаны белгілі. Осы уақыт аралығында «Жұмыспен қамтудың жол картасы-2020» және «2017-2021 жылдарға арналған нәтижелі жұмыспен қамту және жаппай кәсіпкерлікті дамыту» бағдарламалары арқылы кеншілер шаһарына 860 адам қоныс аударды (мұның 193-і – жетім және ата-анасының қамқорлығынсыз қалған балалар, 667-і – қоныс аударушылар, оның 20-сы «Серпін» бағдарламасының түлектері). 170 отбасы мемлекеттік тұрғын үй қорынан пәтермен қамтамасыз етіліп, қалған бөлігіне бір жылға тұрғын үйді жалға алуға субсидия төленді. Батыс Алтайдағы шағын шаһарға еліміздің әр тарабынан мыңға жуық адам көшіп келсе де, әлі де мамандарға зәрулік бар.
«Риддерге қоныс аударамын деушілерге есігіміз ашық. 283 жұмыс орны бос тұр. Бізге негізінен мұғалімдер мен дәрігерлер керек. Өйткені қазір қалада жұмыс істеп жүрген мұғалімдердің 60 пайызы зейнеткерлер. 40-тан астам адам зейнеткерлік жасқа жақындап қалды. Дәрігерлер де солай, олардың 30 пайызы зейнеткерлер», дейді қала әкімі Жомарт Мұратов.
Риддер қалалық Жұмыспен қамту орталығының директоры Әсет Ерсайынов 2013-2019 жылдар аралығында шаһарға 66 мұғалім, 45 медицина қызметкері (оның 12-сі дәрігер), 294 әртүрлі мамандық иелері (маркшейдерлер, жүргізушілер, электр газымен дәнекерлеушілер, металлургтер, геологтар, кеншілер, бағдарламашылар, т.б) келгенін, 7 адам қайта даярлау курсынан өткенін, 3 адам жаңа бизнес-идеяларды іске асыру үшін грант алғанын айтады. «Біз Риддерге қаламызда сұранысқа ие мамандарды шақырамыз. 2019 жылы 35 отбасын (105 адам) қоныстандыру жоспарланып отыр. Бүгінгі таңда 20 отбасы (47 адам) қоныс аударды», дейді ол.
Шығыс Қазақстан облысы,
Риддер қаласы
