Өткенге тағзым етуден өзіндік жолымыз бар

Әрбір тәуелсіз мемлекет өзінің тарихын, тағдыр-талайын зерделеу барысында оны ұлттық идеологияның ажырамас бір бөлігі, тірегі етуге тырысады. Бұл үр­діс бізге де жат емес. Өйткені біз де бар мүмкіндігімізше өткен тарихымызды ұлт­тық идеология биігінен қарастырып, оның өрескел бұрмаланған тұстарын қал­пына келтіріп, қайта жазып, небір әді­лет­сіздіктің жолын кестік. Тарихымызды ұлт­тық идеологиямыздың өзегіне айналдыру бағы­тында қыруар жұмыс атқарылды.

Дегенмен, осы салада көңілге кірбің ұялатып, көптеген пікірталастарға арқау бо­лып, халықтың секемшіл сезіміне кө­лең­кесін түсіріп жүрген көріністерден ары­ла қойғанымыз жоқ. Ондайлар, сырттай қарағанда жай ғана нәрсе болып көрін­ге­німен, ішкі астарында өзгенің бүкір пиғы­лы бүркеніп жатқанын анық аңғартады. Соның бірі ретінде көршілес елден бастау алған, кешегі ортақ тарихи оқиғаларды желеу етіп, қоғамымызға дендеп енген, ха­лық­­тың көңіліне, тарихи жады мен санасы­на тікелей әсер ететін жобаларды айтуға бо­лады. Мәселен, «георгий лентасының» еркін таратылуы, оны халқымыздың бір бөлігі өткен тарихымыздың жарқын белгісі ретінде қабылдауы, сондай-ақ «Мәңгілік полк» шеруінің елімізде жүйелі түрде ұйымдастырылуы қазақ қоғамын алаңдатпай қоймайды. Бұл әрине өз кезегінде түрлі қарсы топтардың пайда болуына алып келеді.

9 мамыр қарсаңында қара-қызғылт-сары түсті «георгий ленталары» кәдімгідей сәнге айналады. Тұрмыстық заттардан бастап, көше, тіпті көліктерге дейін осы баулармен безендіріліп шыға келеді. Ленталар тегін үлестіріліп, қара және қызғылт-сары түске боялған жапсырмалар көзді де, кө­ңіл­ді де жау­лап алады. Осындайда Екінші дүние­жү­зілік соғысқа нүкте қойылған күн өзге тарап­тың идеологиялық қаруына айналып бара жат­қандай сезіледі де әрі-сәрі күй кешуге мәж­бүр боласың.

Жалпы, «георгий лентасы» 1769 жылы Ресей патшайымы Елизавета ІІ енгізген VI дәрежелі «Георгий даңқы» орденінде бе­дер­ленген. Содан бері қара-қызғылт-сары жолақты бұл лента патшалық Ресей мен КСРО-ның қорғаныс, әскер саласына қа­тыс­ты наградаларда көрініс беріп келді. Содан 2000 жылы Ресей «Георгий даңқын» әскери орден ретінде қайта жаңғыртса, іле осы елде 2005 жылдан бастап, яғни Жеңістің 60 жылдығына орай «георгий лентасын» 9 мамыр – Жеңіс күні қарсаңында тарату жолға қойылды. Бұл акция бүгінде кеңестік кеңістік шека­расынан да асып кетіп отыр.

Шын мәнінде көптеген азаматтарымыз бастапқыда отарлаушы патшалық Ресей­дің белгісін ұлықтап жүргенін біле қой­ған жоқ. Кейіннен жүргізілген қоғамдық талқы­лау­лар, осы жөнінде жарық көрген материалдар «георгий лентасына» деген бастапқы түсі­нігімізді өз пайдамызға қарай өзгертіп жі­берді.

Біз көршілес елдер құрмет тұтатын белгі­лер­ге қарсы емеспіз. Бірақ оларды ұлықтау, наси­хаттау өз аймақтарында жүзеге асырылуы тиіс. Өйткені әрбір мемлекеттің өзіне тән түрлі белгілері, өз ұстанымдарына, ұлт­тық идеологиясына сәйкес келетін нышанда­ры бар. Ол сырт елдерге тән белгілердің құр­сауын­да қалмауы тиіс.

Құдайға шүкір, әлемдік деңгейде мойын­далған мемлекеттік символдарымыз, же­рі­­мізді, Отанымызды насихаттайтын, баба­ла­ры­мыздың өнегелі өмір жолынан молынан хабар беретін нышандарымыз, белгілеріміз баршылық. Міне, өзіміздің қолымызда бар осындай дүниелерімізді ұлықтап, кеңінен тұтына білгеніміз абзал. Сонда ғана сырт тараптан жат идеология өзінің басын сұға алмайды.

Ресейдің Том қаласында 2011 жылы аза­мат­тық бастама ретінде көтеріліп, кейін­нен шар­тарапқа жайылған «Мәңгілік полк» шеруі ту­ралы да қоғамымызда түрлі пікірлер бар. Бұл жобаның мақсаты – Екінші дүниежүзілік соғыс құрбандарын есте сақтау. Дегенмен, ба­балар ерлігін, соғыс құрбандарын өзге елден бастау алған акция арқылы еске алу қан­ша­лықты қажет? Біздің ойымызша, тәуелсіз Қазақстан – өзінің өткенін ұлықтап, елі мен же­рінің тұтастығы үшін қан төккен батыр бабаларымызға тағзым етудің өзіндік жолын айқындап алған ел. Сондықтан бізге тек осы жолмен ғана жүру керек!