Басты мақсатымыз – саяси науқанның заң талаптарына сай өтуін қамтамасыз ету. 11 мамырдан басталатын сайлауалды үгіт-насихат жұмыстарына белсене кірісетін боламыз. Кандидатты қолдауға 10 мыңнан астам қол жиналып, 26 сәуірде аяқталғанын айта кеткім келеді, деді сөйлескенімізде президенттіккке үміткер Қасым-Жомарт Тоқаевты қолдау жөніндегі аймақтағы қоғамдық штабтың жетекшісі Владимир Бубенко.
Оның айтуынша, Nur Otan партиясы қалалық, аудандық филиалдарының сенімді өкілдері қажетті әзірліктерден өткен. Штабтың құрамына облыстың құрметті азаматы Құдайберген Қалиев, «Зенченко және К» командиттік серіктестігінің бас директоры, облыстық мәслихаттың депутаты Геннадий Зенченко, партия ардагері Иван Чиркалин, кәсіпқой бокстан әлем чемпионы Жанат Жақиянов секілді танымал тұлғалар тартылған. Барлығы 200-ден астам белсенді жұмылдырылған. Сәуірдің 15-і мен маусымның 7-сі аралығын қамтитын кешенді жұмыс кестесі түзіліп, еңбек ұжымдарымен кездесулер, түрлі акциялар мен форумдар өткізу белгіленген. 1300-ден астам нұротандықтар сайлауалды үгіт-насихат жүргізу шараларына араласып, барлық сайлау учаскелерін баратын болады.
«Елбасының стратегиялық бағыты жалғасып, әлеуметтік бағдарламалар дәйектілікпен орындалып келеді. Мен әр солтүстікқазақстандықтың азаматтық белсенділік танытуына шақырамын. Адал, ашық, әділ сайлау өткізу – өз қолымызда», дейді ел азаматы Құдайберген Қалиұлы.
Бүгінде облыста 600-ден аса сайлау учаскесі құрылған.
Өңір жұртшылығына алдағы сайлау барысын қоғамдық қадағалауға негізделген «Аманат» азаматтық тұғырнамасы да таныстырылды. Арнайы топ мүшелері еңбек ұжымдарында кездесулер өткізіп, құқық, әділдік пен ашықтықты қамтамасыз ету, ынтымақтастық және дайындық шараларын ортаға салды. «Аманат» қазақстандықтардың тәуелсіз ерікті бірлестігі саналады. Сайлаудың негізгі бес бағыты бойынша мониторинг жүргізіледі. Бәсекелестіктің тең болуы, ешкімге артықшылық берілмеуі, ақпараттардың, сайлау учаскелерінің қолжетімділігі басты назарға алынады, деген «Қызылжар» білім орталығының жетекшісі Жанат Мұхамеджанов сайлау өтетін әр учаскеде ұйым атынан бір адам өкілдік ететінін жеткізді. Команда құрамына журналистер, сарапшылар, қоғамдық ұйым өкілдері іріктеліп, оқу тренингтері ұйымдастырылмақ.
Сайлау барысын қадағалауға жергілікті заң консультанттары тәуелсіз палатасының басқарма төрағасы Евгений Кинцел де атсалысқалы отыр.
Солтүстік Қазақстан облысы
