Ауыл әкімі Ардақ Кісентаевтың айтуынша, жасы 94-ке келген Мағаз ата ауданға, ауылына сыйлы. Тау баурайында туып-өскен атамыздың денсаулығы да туған жерінің табиғатымен үндестік тапқандай. Тың.
1942 жылы майданға аттанып, 2-Украин майданы шебінде соғысқан, 2 рет «Ерлігі үшін», «Германияны жеңгені үшін», «Маршал Жуков» медальдарымен, ІІ дәрежелі «Отан соғысы» орденімен марапатталыпты.
Мағаз Бірімжанұлы ұзақ жыл қой бағыпты, 1995 жылы «Мағаз» шаруа қожалығын құрып, 2016 жылға дейін шаруа қожалығын басқарды. Аудандағы мал шаруашылығын дамытуға сүбелі үлес қосты. Еңбек Қызыл Ту ордені, «Еңбектегі ерлігі үшін» медалімен марапатталған. Ауданның құрметті азаматы.
Ақсақал бүгінгі күні шаруа қожалығын басқаруды, яғни ата таяғын ұстауды ұлы Жаңбырбайға берген. Бәйбішесі Қоңыртай апа екеуі 4 ұл, 1 қызды тәрбиелеп өсірді. Қазіргі күні 18 немересі мен 30-ға жуық шөбере-жиендерінің ортасында бақытты өмір сүріп жатыр.
– Мереке күні Мағаз атамызды құттықтап барамыз. Соғысқа қатысқан ардагерлерге бір реттік көмек ретінде 150 мың теңге беріледі, – дейді ауыл әкімі.
Күні кеше облыс әкімі Болат Бақауов Мағаз ақсақалды да 9 мамыр мерекесімен құттықтап, сый-құрмет көрсетті. Майдангердің ұрпақтары да әке шаңырағына жиналды.
– Облыс басшысы әкемізді еске алып, мерекемен құттықтауға келгеніне қатты қуандық, – дейді атамыздың ұлы Баянбек.
Павлодар облысы,
Баянауыл ауданы
