Жапонияда ер адам оқушыларға пышақ ала жүгірген

Токионың Кавасаки қаласында белгісіз ер адам автобусты күтіп тұрған оқушылар тобына пышақ ала жүгірген, кем дегенде 18 адам жараланған. Олардың екеуі қаза тапты: бастауыш сынып оқушысы және 39 жастағы ер адам.

Сондай-ақ 50 жастағы күдікті ер адам өзінің мойнын пышақпен жаралап, кейіннен қолға түсті. Алайда ол да алған жарақатынан қайтыс болды.

Шабуылдың себебі белгісіз.

Kyodo жаңалықтар сайтының хабарлауынша, зардап шеккендердің 16-сы мектеп оқушылары.

Зорлық-зомбылыққа қарсы әрекет ететін полиция оқиға орнынан екі пышақ тапты, деп хабарлайды NHK.

Жапонияда мемлекеттік сапармен жүрген АҚШ президенті Дональд Трамп қайғылы оқиғаға көңіл айтты.

Жапония әлемдегі зорлық-зомбылық деңгейі ең төмен елдерге жатады, бірақ соңғы жылдары пышақ қолдану арқылы бірнеше шабуыл жасалды.