Бұл оқиға бойынша астаналық полицейлер Қылмыстық кодекстің 141-бабында көрсетілген «Балалардың өмiрi мен денсаулығының қауiпсiздiгiн қамтамасыз ету жөнiндегi мiндеттердi тиісінше орындамау» бойынша іс қозғап, тергеуді бастаған. Осы жазатайым оқиғаға орай журналистер алдына шығып, түсінік берген Нұр-Сұлтан қалалық білім басқармасы басшысының орынбасары Дулат Жекебаев істің ақ-қарасы осы тергеу жұмыстарынан кейін айтылады дегенімен, өзінің қолындағы бірқатар мәліметімен бөлісті.
– Қаза болған қыз бала №10 мектептің оқушысы. Жазғы лагерьге ата-анасының өтінішімен жазылған. Ата-аналар балаларын «Хан Шатырдағы» бассейнге апаруды өтінген. Бассейнге балаларды мектеп мұғалімдерімен бірге бірнеше ата-ана да апарған. Жалпы, бассейнге 200-дей бала барған, – деді Д.Жекебаев.
Басқарма өкілінің айтуына қарағанда, «Хан Шатырға» мектеп жанындағы жазғы лагерьлерде демалып жатқан балалар жыл сайын топтастырылып апарылады екен.
– «Хан Шатырдағы» нұсқаушылар тарапынан баланың қауіпсіздігіне байланысты барлық шара дұрыс орындалған, – деді Д.Жекебаев.
Қолдағы деректерге қарағанда, қаза тапқан жеткіншек отбасындағы төрт баланың үлкені болған.
Бассейнге келген балалар тобына тәрбиешілер, тәлімгерлер мен ата-аналардан құралған 24 ересек адам басшылық еткен.
