Әлемдік ақпарат кеңістігінде өзіндік орны бар «РИА новости» агенттігі елімізде өткен Қазақстан Республикасы Президентінің сайлауы туралы жан-жақты хабар таратты. Агенттік: «Өткен жексенбіде, яғни 9 маусым күні Қазақстанда кезектен тыс президенттік сайлау өтті. Орталық сайлау комиссиясының мүшесі Ләззат Сүлеймен хабарлағандай, сайлауға ел сайлаушыларының 77,4 пайызы қатысты», деп жазды.
Сонымен қатар агенттік президенттік сайлауда Қасым-Жомарт Тоқаевтың сайлаушылардың басым бөлігінің сеніміне ие болғанына, яғни 70 пайыздан астам дауысқа қол жеткізгеніне баса назар аударған.
Бұған қоса, жаңа Президентті ұлықтау рәсімі алдағы 12 маусым күні өтетінінен хабардар ете отырып, аталған сайлауда қазақстандық сайлаушылардың жоғары деңгейде белсенділік көрсеткенін, саяси науқанның лайықты дәрежеде ұйымдастырылғанын, сондай-ақ шетелдік және жергілікті байқаушылардың тыңғылықты жұмысын атап көрсеткен.
Қытай Президенті Си Цзиньпин Қасым-Жомарт Тоқаевты Қазақстан Президенті болып сайлануымен құттықтады.
Құттықтау хатында Си Цзиньпин Қытай мен Қазақстанның тату көрші екенін, ортақ сенімге, мәмілеге және стратегиялық әріптестікке иек артқан қарым-қатынас орнатқан ел екенін жеткізді.
Қазіргі таңда өзара ортақ байланыс жоғары деңгейге жетіп, «Бір белдеу, бір жол» жобасының жемісін көріп отырмыз. Бұл адамзаттың келешегіне салынған даңғыл, делінген Қытай басшысының хатында.
Си Цзиньпин қазақ-қытай қатынасының дамуына маңыз беріп, Қ.Тоқаевпен тығыз байланыс орнату арқылы екіжақты байланыстың одан әрі дами беретініне сенім білдірді.
Қазақстандағы қезектен тыс Президент сайлауы жөніндегі ақпараттар Түркияның бірқатар басылым бетінен көрініс тапты. Бауырлас елдің бұқаралық ақпарат құралдары еліміздегі Президент сайлауына халықтың жұмыла қатысып, өте жоғары деңгейде өткенін жарыса жазды.
Euronews-тің Түркиядағы бөлімі Президент сайлауы кезінде халықтың көңіл күйі көтеріңкі болғанын, халықпен бірге Президенттікке үміткерлер де туыстары мен әріптестерімен бірге дауыс бергенін жазады. Әр үміткер жөнінде ақпарат бере отыра, шетелдегі сайлау учаскелері туралы да хабарлайды.
Ал Анадолу агенттігі еліміздегі сайлауды жіті бақылап, соңғы жаңалықтарымен бөлісіп, түрік халқын хабардар етіп отырды. Сайлау басталысымен Қазақстан тарихында алғаш рет үміткер санының көп болуын, алғаш рет әйел үміткердің додаға қатысуын жазады. Одан әрі сайлау барысымен, шетелдік және халықаралық ұйымдар атынан бірқатар байқаушылардың бақылап жүргені туралы ақпарат береді. Exit-Poll нәтижесімен алғашқылардың бірі болып бөліскен шетелдік ақпарат агенттігі де осы – Анадолу агенттігі. Сонымен бірге ТүркПА Сайлау байқаушысы делегациясының басшысы, халық қалаулысы Исмет Учманың пікірімен бөліседі. Оның айтуынша, Қазақстандағы кезектен тыс Президент сайлауы демократиялық түрде ашық әрі әділ өткен.
Түрік басылымдары мен ақпарат агенттіктері еліміздегі Президент сайлауында жеңіске жеткен Қасым-Жомарт Тоқаевты құттықтап, жұмысына сәттілік тіледі.
UzNews.uz порталы «Қазақстандағы сайлаудың нәтижесі – халықтың Қасым-Жомарт Тоқаевқа көрсеткен толық сенімі мен кең қолдауы, оның елдің орнықты дамуы мен халықаралық беделін арттыруға қосқан үлесіне зор бағасы», деп жазды. Сондай-ақ портал екіжақты ынтымақтастықты дамытуға Қазақстан Президентінің биыл сәуір айында Өзбекстанға жасаған алғашқы мемлекеттік сапары жаңа серпін бергендігін, бұл сапар кезінде достық, тату көршілік және стратегиялық әріптестік байланысты нығайтуға одан әрі де бейілді екендері расталғанын атап өткен.
Бұдан бөлек, аталған портал Мемлекет басшылары телефон арқылы сөйлесу барысында өзбек-қазақ қарым-қатынасын нығайтуды, сондай-ақ аймақтық және халықаралық күн тәртібіндегі өзекті мәселелерді талқылағанын, бұған қоса, жоғары деңгейдегі, оның ішінде халықаралық ұйымдардың шеңберінде алдағы кездесулердің кестесі қаралғанын жазды.
Шетелдік басылымдар 2019 жылдың 9 маусымында Қазақстанда өткен кезектен тыс Президент сайлауы туралы көп жазды. Соның бірі америкалық The New York Times басылымы «Қазақстан жаңа көшбасшысын таңдады» деген тақырыппен көлемді сараптамалық ақпарат жазды.
Орталық сайлау комиссиясы сайлауда Nur Otan партиясының атынан қатысқан кандидат Қасым-Жомарт Тоқаев ең көп дауыс жинағанын жариялады. «Жексенбілік дауыс берудің ресми нәтижелері Нұрсұлтан Назарбаев төрағалық ететін партия атынан қатысқан Қасым-Жомарт Тоқаев өзінің басты қарсыласын, ресми түрде рұқсат етілген оппозициялық кандидат Әміржан Қосановтан айтарлықтай басым түскен. Қасым-Жомарт Тоқаевқа жалпы электораттың 70,7 пайызы дауыс берсе, Әміржан Қосанов 16 пайыз дауыс жинаған», деп жазады басылым.
Сонымен қатар The New York Times басылымы мақалада елдің Тұңғыш Президенті Нұрсұлтан Назарбаевтың наурыз айында Қазақстан Президенті ретінде өкілеттілігін тоқтату туралы шешім қабылдағаны жайында да хабардар еткен.
Ресейлік gazeta.ru сайты елімізде биылғы 9 маусым күні өткен президенттік сайлау жөнінде таратқан ақпараттарында қазақстандық сарапшылардың пікірлерін негізге ала отырып, аталған сайлаудың тыңғылықты ұйымдастырылғанын әрі барлық үміткерлерге тең мүмкіндіктер берілгенін атап көрсетті.
«Қазақстанда 9 маусым күні өткен президенттік сайлауда Қасым-Жомарт Тоқаев сайлаушылардың 70 пайыздан астам дауысына ие болып, жеңіске жетті. Оның басты қарсыласы саналған үміткер 15 пайыз көлемінде дауыс жинады. Қазақстандық сарапшылардың айтуынша, жаңадан сайланған Мемлекет басшысы елдің Тұңғыш Президенті Нұрсұлтан Назарбаевтың бұған дейін жүргізіп келген ішкі және сыртқы саясатын жалғастырмақ. Оның ішінде Қазақстан мен Ресейдің бүгінгі қатынасы да одан әрі дами береді», деп жазды gazeta.ru сайты.
Сонымен қатар аталған сайт exit-poll нәтижелеріне назар аударып, өзге үміткерлердің көрсеткіштерін атап көрсеткен.
Бұдан бөлек, сайт Қасым-Жомарт Тоқаевтың мықты саясаткер, өз елінің лайықты да адал ұлы екенін айта келіп, оның алдағы уақытта басымдық беретін бағыттарына тоқталды.
