«Ақ желкен» қонақүй кешенінде болған кезінде облыс әкімі Е.Маржықпаев қаланың бас жобасына байланысты Қопа көлін жағалай салынатын заманауи құрылыс жоспарымен егжей-тегжейлі таныстырды. Көл жағалауы абаттандырылып, көпқабатты үйлермен қатар, әлеуметтік-тұрмыстық қызмет көрсететін сан алуан нысандар бой көтермек. Кенесары көшесінен бастау алатын кең даңғыл жағалауды жанай өтіп, «Васильовка» шағын ауданына дейін созылады. Бұл жоба қала көркін кіргізумен қатар, баспана мәселесін шешуге оң әсер етпек.
Жергілікті жерде өнім өндіру өте маңызды. Қаладағы «Два Кита» жауапкершілігі шектеулі серіктестігі жиһаз жасаумен айналысады. 2003 жылдан бастап жұмыс істеп келе жатқан кәсіпорын 2015 жылы осы заманғы озық технологиямен жұмыс істеуге мүмкіндік беретін жаңа құрал-жабдықтарын сатып алып, жаңғыру сатысынан өткен болатын. Бүгінде кәсіпорынның бұйымдары елімізде және Ресейдің сауда нүктелерінде сұранысқа ие.
Мұнан соң Премьер-Министр А.Мамин «КамАЗ-Инжиниринг» акционерлік қоғамының тыныс-тіршілігімен танысты. Еліміздегі көлік шығару өндірісіне қомақты үлес қосып отырған кәсіпорынның жылдық қуаты 3 мың көлікке тең. Өндіріс қуатын барынша арттырып отырған кәсіпорын 2005 жылдан бері жұмыс істейді. Кәсіпорын шығарған көліктерді Қазақстанның кез келген жерінен кездестіруге болады. Бүгінде 700-ден аса адам жұмыс істейтін кәсіпорындағы орташа жалақы – 150 000 теңге.
Кәсіпорында Премьер-Министрге Қазақстанның өндіріс ошақтарында бірінші рет шығарылып отырған мүгедектер арбасының таныстырылымы өткізілді. Бұл ендігі арада мүмкіндігі шектеулі адамдардың қажеттілігін өтейтін болады. Әдетте мұндай бұйымдар Ресей мен Қытайдан, Еуропа елдерінен жеткізіледі. Бұл жолғы арба Еңбек және халықты әлеуметтік қорғау министрлігінің тапсырысы бойынша дайындалған. Зауыт қазір алғашқы партияны пысықтау үстінде.
– Бұл электр қуатымен жүретін көлік, салмағы 70 килоға таяу. Арбаға екі аккумулятор орналастырылады. Оның әрқайсысының қуаты 15 шақырым жол жүруге әбден жеткілікті. Екі аккумулятормен отыз шақырым жер жүре алады. Жылдамдығы сағатына 6 шақырымға тең,– деп атап өтті «Тыныс» акционерлік қоғамының конструкторлар бюросының басшысы Сергей Юдин.
Сөз арасында мүгедектер арбасына қажетті қосалқы бөлшектердің барлығы осы кәсіпорыннан шығарылатынын айта кетуіміз керек. «Тыныс» акционерлік қоғамында ұшақтар мен тікұшақтардың жабдықтаушы бөлшектерімен қатар Қазақстан Республикасының күштік құрылымдарына қажетті құрал-жабдықтар да дайындалады. Бронды кеудешелер экспортқа шығарылады. Азаматтық бағыттағы өнім түрлері де аз емес. Мәселен, кәсіпорынның өрт сөндіру құралдарына, полиэтилен құбырларына сұраныс көп. Сондай-ақ мұнай өнеркәсібі мен тау-кен байыту салалары, «Қазақстан темір жолы» акционерлік қоғамы тарапынан да тапсырыстар түсуде.
«КамАЗ-Инжиниринг» акционерлік қоғамы облыс орталығындағы аса ірі Қазақстан-Ресей бірлескен кәсіпорны санатында. Бұл жерде жүк көліктері, арнайы техникалар жиналуда.
– Егер өндіріс көлемі туралы айтатын болсақ, авиацияға қажетті заттар 30-40 пайыз төңірегінде. Қалғаны ұлттық компаниялардың өтінімдері, – дейді маркетинг бөлімінің басшысы Ерден Аюпов.
Сапар соңында облыстық әкімдікте өңірдің әлеуетін арттыру мәселелерін жан-жақты талқылаған кеңес өткізілді.
КӨКШЕТАУ
