– 2014 жылдан бастап Ақтау қаласындағы Ішкі істер департаментінің жедел әрекет ететін арнайы жасағында жұмыс істеймін. Бұған дейін жұмысымды бокспен қатар алып жүрсем, бүгінде толық штаттамын.
– Рио Олимпиадасынан соң аздаған үзіліс алып, кейіннен құрамаға оралдыңыз. Тіпті Азия ойындарына бару туралы жоспарыңыз да болған екен. Оның орындалуына не кедергі болды?
– Рас, Бразилия жеріндегі аламаннан соң үзіліс алып, біраз тынықтым. Қайта құрамаға оралып жаттығуды жалғастырдым. Джакартадағы Азия ойындарына қатысу туралы ой болған. Дегенмен, Президент кубогының қорытындысы бойынша Индонезияға Саматәлі Төлтаевты алып кетті. Бапкерлер оның Токио Олимпиадасына қатысу мүмкіндігін ескеріп, әлеуетін байқағысы келсе керек.
– Жылдың аяғында бокстан біржола кетуіңізге осы жайт себеп пе?
– Оны бапкерлермен ақылдаса келе шештік. Салмағымызда орнымызды басатын жастардың барын көрген соң еш уайымсыз бокспен қоштасуға болатынын түсіндім. Оның үстіне жарақатым көбейіп, қабағым қайта-қайта жарылып, ағзам шаршай бастағандай көрінді. Осы жайттардың бәрін ескере отырып, ұлттық құрамадағы орнымды жастарға босатқаным жөн болар дедім.
– Кез келген спортшы карьерасын есте қаларлық жеңіспен аяқтасам дейді. Сізде ешқандай өкініш жоқ па?
– Өкініш жоқ. Тек шүкіршілік етемін. Әуесқой бокста Олимпиада ойындарына қатыстым, әлем чемпионатының жүлдегері, Азия чемпионатының жеңімпазы атандым. Әрине төртжылдықтың бас додасында жүлдегерлер қатарына іліксем деген арманым болған. Ол енді кез келгенге бұйыра бермейтін бақ. Сондықтан осы жетістіктерімнің өзіне Аллаға шүкір деймін. Бокстың арқасында талай елді көрдік. Халықтың ыстық ықыласына бөлендік. Үлкенді сыйлап, кішілерге үлгі бола алғаныма қуанамын.
– Маңғыстау өңіріндегі бокстың дамуына қандай баға бересіз?
– Соңғы ел біріншілігі Ақтауда өткені белгілі. Чемпионат қорытындысы бойынша Ерік Әлжанов, Нұрбол Қалжанов, Мәулен Өскенбек, Бекзат Нұрдәулетов, Саматәлі мен Санатәлі Төлтаевтар, Айболды Дәуренұлы секілді боксшылар ұлттық құрамаға енді. Бұйыртса біздің орнымызды басады деп үміттенеміз.
– Материалдық қолдау жағы қалай?
– Ол нәтижеге байланысты. Мысалы, Қазақстан чемпионы атанған спортшыға жергілікті қалталы азаматтар бір бөлмелі пәтер сыйлайды. Ал әлем не Азия чемпионаттарында жүлдегер атанып жатса, әкімдік пен федерация тарапынан қолдау көрсетіледі. Ол жағынан ешқандай мәселе жоқ. Ең бастысы, спортшылардың өзінде жеңіске деген жігер, көзінде от болса болғаны.
– Сіз Рио Олимпиадасына жолдаманы АРВ жобасы арқылы иелендіңіз. Мүмкіндігіңізді әрі қарай кәсіпқой боксқа сынап көру туралы ой болған жоқ па?
– Ондай ойлар, ұсыныстар да болды. Мадияр Әшкеев бауырымыздың жанына барсам дегенмін. Бірақ отбасымды тастап кете алмадым. Ата-анам да жас емес. Өзім – үйде жалғыз ұлмын. Осының бәрін елеп-екшеп, елде қалуды жөн көрдім. Өмірімді толық боксқа арнамай, әуесқой бокстағы жетістіктеріме қанағат деп, жақындарымның жанында қалдым.
– Ұлттық құрама басшылығында өзгерістер болды. Ғалым Кенжебаев қандай жаңашылдықтар алып келеді деп ойлайсыз?
– Ғалым ағайдың қарамағында жаттығып көрген емеспін. Сондықтан оның әдіс-тәсілінен бейхабармын. Ол кісі жастармен бірге жақсы жетістіктерге қол жеткізді. Геннадай Головкиннің бапкері. Яғни, білікті маман екендігіне күмәнім жоқ. Жұмысына тек сәттілік тілеймін.
Алайда Мырза ағайдың бас бапкерліктен кеткенін естігенде көңіл күйім түсіп кетті. Өзгенің пікіріне жалтақтамайтын, жұмысын білетін, шәкірттерінен талап ете алатын білікті маман ғой. Тамыр-таныстық дегенді білмейді. Кім шынымен де дайын, кімнің көзінде оты бар, соны жарысқа апаратын. Ол кісіге алғысым шексіз. Қуанғаным, Мырза ағай да, Марат ағай да құрамадан кеткен жоқ. Осындай білікті бапкерлердің басы біріккенде нәтижелер де соған лайық болады деп сенемін.
– Өзіңіз боксқа қалай келіп едіңіз?
– Ең алғаш бокс үйірмесіне ағам ертіп апарды. «Менен жақсы боксшы шықпаса да, сенен жақсы боксшы шығады» дегені есімде. Сидней Олимпиадасындағы ағаларымыздың жетістіктерінен жігерленіп, олардың елге оралғандағы қуанышын көріп, мен де дәл осылай медаль алып елімді, ата-анамды қуантсам деген арман пайда болды. 14 жастағы жасөспірім кезім. Оның алдында еркін күреске қатысып жүргенмін. Сондықтан ба, боксқа тез бейімделіп кеттім.
– Әңгімеңізге рахмет.
Мәдина АСЫЛБЕК,
журналист
