Жалпы, ХХІ ғасырда, жаһандық қауымдастық дамудың жаңа белестерін бағындырып жатқан кезеңде дамыған елдердің барлығы мемлекеттің басты байлығы, алға сүйрейтін локомотиві адам екенін, елдің азаматтары екенін жақсы түсінді. Сол үшін жалпы халықтың деңгейін көтеруге, адами капиталдың сапасын арттыруға тырысып жатыр. Осы орайда, Қасым-Жомарт Тоқаевтың сөзінде биліктің басты миссиясы халықтың жағдайын жақсарту екені айқын айтылды. Яғни, әлеуметтік жағдайды көтеру, табысты арттыру, баспана салу, әлеуметтік әділеттілік орнату, білім беру мен денсаулық сақтау саласын дамыту, ең аяғы ауыз сумен қамту сынды мәселелердің кез келгені белгілі бір дәрежеде азаматтардың жалпы деңгейін көтеруге әсер ететіні анық.
Бүгінгі таңда Қазақстандағы 14-29 жас аралығындағы жастардың саны 4 миллион шамасында. Олардың сауаттылық деңгейі 99,8 пайызға тең. Мен өзім де екі ұл өсіріп отырған анамын. Жас ұрпақ әрбір отбасының ғана болашағы емес, елдің де болашағы деп санаймын. Балаларымыздың жан-жақты жетілген азамат болғанын қалаймын. Сол себепті Президенттің сөзінде осы жастар мәселесі ерекше аталғанына көңіліміз толды.
Әрбір жас азамат арман-мақсатына өз елінде жүріп қол жеткізіп, кең-байтақ елінің дамуына үлесін қосуға тиіс. Бұл бағытта елімізде біршама жұмыстар атқарылып келді, алдағы уақытта ол жалғаса беретінін де Мемлекет басшысы айтты. Мәселен, биылғы жыл Жастар жылы деп жарияланды. «Жастар – ел тірегі» жобасын, «Жас кәсіпкер» бизнес бастамасын дамыту бағдарламасы жүзеге асырылуда. Енді жұмысқа орналастыру бағдарламалары дайындалмақ, «Президенттің кадрлық резерві» жасақталмақ. Жастарды қолдау – елді дамытуға жұмсалған ең басты инвестиция, ең тиімді инвестиция. Кез келген елдің дамуына жастар саясатының дұрыс айқындалуы ерекше ықпал етеді. Жоғарыда айтылған шаралар еліміздің тұрақты дамуына үлкен үлесін тигізетіні сөзсіз.
Динара АҚЫНБЕКОВА,
экономика ғылымдарының кандидаты
