«Астана» мықтылармен ойнайды
Ең алдымен Чемпиондар лигасының жеребесі тартылды. 2013-2014 жылғы маусымнан бері Еурокубок бәсекелеріне тұрақты түрде қатысып келе жатқан еліміздің бес дүркін чемпионы биылғы маусымда Румынияның төрт дүркін жеңімпазы ЧФР (Клужа) командасымен келесі кезеңнің жолдамасын сарапқа салады. Жеребе қорытындысынан кейін отандық футбол мамандары «Астанаға» жеребе жолдас болмағанын айтады. Қазақ футболының ардагері Юсуп Шадиев «Астана» алдағы уақытта дайындығын күшейтіп, құрамын толықтырмаса, Румыния командасын жеңу қиынға соғады дейді. «Қазір Румыния футболы қарқынды дамып келеді. Сондықтан «Астанаға» оңай қарсылас жолықты деп айта алмаймын. Елорда командасы ел біріншілігінің соңғы турында «Қайсарды» ірі есеппен жеңгенімен, соңғы кезде ала-құла өнер көрсетіп жүр. Дегенмен, екі команданың да мүмкіндіктерін 50/50 деп бағалаймын. «Астана» үшін сырт алаңдағы ойын қиынға соғады, сондықтан мықтап дайындалу керек», дейді ол.
Жеребеден кейін пікір білдірген ЧФР командасының спорттық директоры Богдан Мара жеребе жолдас болмағанын айтады. «Әрине біз жеребеде «Астана» мен «Црвена Звездадан» басқа команданы күтіп едік. Бірақ қаламаған командамыздың біріне тұтылдық. Жалпы, биылғы жеребе біз үшін ауыр басталды. Енді бізді алда өте қиын екі матч күтіп тұр. Сондықтан дайындығымызды екі есе күшейтуіміз керек. «Астананың» Еуропаға жайылған даңқын білеміз. Оларды кезінде Испанияның азулы «Атлетико» командасы да жеңе алмаған. Жалпы айтқанда, біз Еуропаның қазіргі таңдағы өте мықты ұжымына қарсылас болдық», дейді Б.Мара.
Ал «Астана» командасының бас бапкері Роман Григорчук мұндай деңгейдегі қарсыласты жеңу үшін жақсы дайындық пен толыққанды құрам қажет екенін айтады. «Мен жеребе тарту рәсіміне әрдайым сабырмен қараймын. Соңғы уақытта менің командама ықтимал қарсыластардың ең мықтылары тап келуде. Осы жылы да сол үрдіс жалғасын тапты. Бізге мұндай деңгейдегі қарсыласты жеңу үшін жақсы дайындық және толыққанды құрам қажет. Дегенмен, румындарға қарсы кездесуге дейін біз чемпионат аясында маңызды үш ойын өткіземіз. Дәл қазір бар күшті сол ойындарға салуымыз керек», дейді бас бапкер.
Енді екі команда туралы аз-кем статистиканы сөйлетсек. ЧФР командасы қазіргі таңда УЕФА рейтингінде 110-орынға табан тіреген. Германияның «transfermarkt.de» сайтының ақпараты бойынша, командадағы футболшылардың жалпы құны 25,45 млн еуро. Құрамның орта жасы – 27,9 жас. ЧФР өз елінің және Румыния кубогының 4 дүркін чемпионы. Сондай-ақ 3 рет Суперкубокта топ жарған. Ал «Астана» командасы УЕФА рейтингінде 57-орында тұр. Футболшылардың жалпы құны – 23,73 млн еуро. Орта жасы – 26,8 жас. Екі клуб арасындағы алғашқы кездесу 9 шілде күні Нұр-Сұлтанда, қарымта матч бір аптадан соң сырт алаңда өтеді.
Қарсыластардың деңгейі бірдей
Чемпиондар лигасы жеребесінің ізін ала Еуропа лигасында бақ сынайтын командаларымыздың қарсыластары анықталды. Қазақ футболының ардагері Павел Евтеевтің сөзінше, қазақстандық командаларға жеребе жақсы түскен. «Меніңше, «Астанаға» қарағанда, Еуропа лигасында ойнайтын командаларға жеңіл қарсыластар түсті. Кездесу екі ойынға созылатын болған соң, еліміздің командалары еш қиындықсыз келесі кезеңге өтеді деп сенемін. Бәрінде келесі кезеңге өтуге мүмкіндік бар», дейді П.Евтеев.
Еуропа лигасындағы отандық командалардың қарсыластарын таныстырып өтсек.
«Қайрат». Еуропа лигасының алғашқы іріктеу кезеңінде Алматының командасы босниялық «Широки-Бриег» командасымен күш сынасады. Жалпы, босниялық клуб қазақстандық футбол жанкүйерлеріне жақсы таныс. Еуропа лигасының 2013-2014 жылғы маусымында Павлодардың «Ертісімен» кездесіп, екі ойын қорытындысы бойынша 4:3 есебімен басым түскен. Араға үш жыл салып 2017-2018 жылғы маусымның алғашқы іріктеу кезеңінде Шымкенттің «Ордабасы» командасымен жолы түйісті. Бұл жолы да екі ойын қорытындысы бойынша «Широки-Бриегтің» мерейі үстем болған. Енді міне, босниялық клуб қазақстандық командамен үшінше рет кездескелі тұр. Осы матчта «Қайрат» «Широки-Бриегтің» жеңісті жолына нүкте қояды деп сенеміз. Жалпы, «Широки-Бриег» Еурокубок додаларына жыл сайын қатысады. Бірақ қазірге дейінгі ең үздік нәтижесі үшінші іріктеу кезеңіне жолдама алуы. 1948 жылы құрылған команда ел чемпионатын небәрі екі рет ұтқан.
«Тобыл». Қостанайдың командасы Еуропа лигасының алғашқы іріктеу кезеңінде Люксембургтің «Женесс» клубымен кездеседі. «Женесс» өз елінің 28 дүркін жеңімпазы. Соңғы рет 2010 жылы топ жарған. Еуродода ойындарына өткен ғасырдың 60-жылдарынан бастап қатысқанымен, екінші іріктеу кезеңінен ары асып көрмеген. Былайша айтқанда, төмен деңгейдегі команда. Жалпы, «Тобыл» келесі кезеңге еш қиындықсыз өтуі керек.
«Ордабасы». Шымкенттік команда Еуропа лигасына биыл бесінші рет қатысып отыр. Бұған дейін Сербия, Норвегия, Израиль және Босния және Герцеговина елінің командаларымен ойнаса, биыл Грузияның «Торпедо» командасымен кездеседі. Жалпы, «Торпедо» клубы да қазақстандық командаларға бөтен емес. Еуропа лигасының 2012-2013 жылғы маусымында «Ақтөбе» командасымен кездесіп, екі ойын қорытындысы бойынша 1:2 есебімен жеңіліп қалған. Өз елінің төрт дүркін жеңімпазы саналатын «Торпедо» былтыр Еуропа лигасының плей-офф кезеңіне дейін жеткен. Бұл команда «Ордабасы» үшін аса қиын қарсылас емес, дегенмен футбол болжауға келмейтін ойын екенін ескеру керек.
Қорыта айтқанда, алдағы кездесулердің қандай нәтижемен аяқталатынын болжам емес, уақыт көрсетеді. Дегенмен, «Астана» клубынан басқа Еуромаусымға қатысқалы тұрған үш клубымыздың қарсыластары өздерімен деңгейлес клубтар. Еуропа жасыл алаңдарында ел намысын қорғайтын командаларымызға жеңіс тілеп, сәттілік серік болсын дейміз.
