Ағылған көмекте есеп жоқ

24 мыңнан аса адам эвакуацияланған орталықтарда сәбилердің жан дүниесіндегі соққыны емдеген гештальт-терапевт психологтар қазір сол жерде емдік шараларды жалғастыруда. Бүгінгі таңда тұрғындардың бастан кешкен эмоцияларын зерттеу, болған оқиғаны түсіндіру психологтардың негізгі терапиясы болып отыр.

Сондай-ақ еріктілер халық арасында «бактериологиялық қару-жарақтан, радиациядан және апаттан көптеген адам қайтыс болды» деген ақпараттың жалған екенін түсіндіріп жүр. Әлеуметтік желілерде жұртты дүрліктірген «Арыстықтар далада босып жүр. Оларға азық-түлік жетпей жатыр» деген ақпарат шындыққа жанаспайды.

Себебі апаттан зардап шеккен арыстық­тарға Қазақстанның түкпір-түкпірінен көмек келуде. «Арыс, біз біргеміз!» акциясы бүкіл республика бойынша ұйымдастырылды.

Жергілікті билік өкілдері сол көмекті рет-ретімен қала тұрғындарына үлес­тіруде. Ал баспанасыз қалған тұрғындар­ды уақыт­ша қоныстарға орналастыру бо­йынша жүйелі жұмыс жолға қо­йыл­ған. Арыс қаласындағы Ережепбай Мол­­дабаев атындағы орта мектепте тұр­ғындар уақытша қоныстанатын 800 орын дайындалды. Мұнда жарылыс салдарынан үйлері толық бұзылған және жарамсыз күйге түскен тұрғындар орналасуда. Бұл орталықта қоныстанушылар 3 мез­гіл тамақпен және жатын орындар­мен қамтылды. Балаларға арналған ойын алаңшалары да қарастырылған. Ал жары­­лыс­тан зақым келген үйлер толық жөн­дел­ген соң тұрғындар өз шаңырақ­тарына оралмақ.

Арыс қаласындағы жарылыстан зардап шеккен тұрғындарға жан-жақтан келіп жатқан гуманитарлық көмек күн санап ұлғаюда. Бүгінгі күнге дейін қоймаға 270 тонна қажетті азық-түлік өнімдері, киім-кешек, гигиеналық заттар жиналса, соның 198 тоннасы тұрғындарға берілді. Гуманитар­лық көмектің 70 тоннасы кеше таратылды. Қосымша Арысқа қарай 10 жүк көлігі келе жатқанын айта кетейік.

Күні кеше Қарағанды, Жамбыл, Қызылорда, Ақтөбе, БҚО, СҚО, Павлодар, Қос­танай, Алматы облыстары мен Алматы және Шымкент қалаларынан Арысқа жіберілген 150 тонна заттың 80 тоннадан астамы тұрғындарға таратылды. Нұр-Сұлтан қаласы мен өзге де аймақтардан азық-түлік тиелген жүк көліктері Арысты бетке алды.

Арыстағы төтенше жағдайға байланысты «Түркістан» корпоративтік әлеуметтік даму қоры­на түскен қаржы көлемі 1 млрд теңгеден асты. Қор әлі де шотта жинақталып, арнайы ко­мис­сия арқылы тұрғындарға берілетін болады.

Қаладағы барлық үйге суық су келді. Алайда кеше орталық желіде шыққан ақаудан 1500-дей абонент уақытша сусыз қал­ған еді. Жөндеу жұмыстары барысында су жеткізу желісін үзген снаряд табылды. Ақауды жөндеу жұмыстары аяқталған соң тұрғындарға су тұрақты беріле бастады.

30 маусым күні Арыс қаласының 140 оқу­шысы Ақмола облысындағы Бурабайға оқу­шы­лар лагеріне демалысқа кетсе, 200 оқу­шы Нұр-Сұлтан қаласына жол жүрді. Олар­дың қауіп­сіздігіне тәлімгерлер жауап беретін болады.

Арыстық балаларды демалысқа жіберудегі басты мақсат – төтенше жағдай факторлары салдарынан мектеп оқушыларына психологиялық көмек көрсету. Осы орайда жиыны 340 оқушыны ата-аналары Шымкент қаласындағы темір жол вокзалынан шығарып салып, сәт-сапар тіледі.

Айта кетейік, Арыс қаласындағы 40 мектепте 19 916 бала білім алады, мектепке дейінгі ұйымдарда 5071 бала тәрбиеленіп жатыр. Жалпы, бүгінгі күнге дейін арыстық 570 бала жазғы саяхатқа жіберілді.