Қасым-Жомарт Тоқаев жаңа спорт кешенінің жаттығу залдары мен инфрақұрылымын аралап көрді. Елорданың өзге ғимараттары секілді бұл нысан да ерекше. «Jekpe-Jek» сарайында балалармен қатар, ересектер де жаттыға алады. Бұған қоса «Jekpe-Jek» сарайы спортшыларды дайындауға бокс, күрес, дзюдо, ауыр атлетика және спорттың басқа да түрлерінен сайыстар өткізуге арналған. Ал спорт залына 5 мың көрермен сыяды. Спорт кешенінде 25 метрлік бассейн, фитнес-орталығы, қонақүй мен мини-футбол алаңы да бар.
Сондай-ақ Қазақстан Президенті Жастар жылын атап өту аясында «Jekpe-Jek» сарайында елорда күніне арналған жекпе-жек өнерінің гала-фестиваліне қатысты. Қазақстанның жекпе-жек өнері қауымдастығының ұйымдастыруымен өткен фестиваль барысында жас спортшылар кәсіби жекпе-жек өнерінен қойылымдар көрсетті.
Жарыстың ашылу салтанатында Мәдениет және спорт министрі Ақтоты Райымқұлова жаңа нысанның ел спортын дамытудағы маңызына тоқталды. «Jekpe-Jek» сарайы мемлекетіміздің тікелей қолдауымен қамқорлығының арқасында ашылды. Елімізде денешынықтыру және спорттың дамуына барлық жағдай жасалғанын айтты. «Бұл сала бүгінгі таңда маңызды әлеуметтік-экономикалық сала ретінде аяғынан нық тұрды деп айтуға болады. Осы сөзімнің айқын дәлелі – Елбасы Нұрсұлтан Назарбаевтың бастамасымен салынған бүгінде есігін бірінші рет айқара ашып отырған «Jekpe-Jek» сарайы құтты болсын!», деді министр.
«Jekpe-Jek» спорт кешені халықаралық спорт федерацияларының талаптарына сай салынып, құрылыс кезінде қуат үнемдеу жүйесі, желдету мен жарық түсіру мәселелері ескеріліп, тың инновациялық инженерлік шешімдер қабылданған. Ғимараттың үшбұрышты пішімі Қазақстанның еркіндігі мен қуатының символына айналған бүркіттің көкке қанат қаққан сәтін бейнелейді.
