Облыс орталығындағы «Қазақстан Алюминийі» АҚ-та металлургия, құю өндірісі, электр энергетикасы, машина жасау, технологиялық машиналар мен жабдықтар, тепловоз машинисі, құрылыс саласы, экология, автоматтандыру және басқару, икемді автоматты желілер және ақпараттық жүйелер секілді техникалық мамандықтарда оқып жатқан студенттерге осындай жақсы мүмкіндік берілді. Ашық есік күні арқылы студенттер кәсіпорындарда сұранысқа ие бос орындарды біліп, өндіріс барысын көріп, мамандарға түрлі сұрақтар қойды.
– Ашық есік күні студенттерге өндірістің барлық ерекшеліктерін түсінуге көмектеседі, таңдаған мамандығын тереңірек тануға мүмкіндік береді, – деді Еуразиялық топтың басқарма төрағасының әлеуметтік мәселелер жөніндегі орынбасары Инна Губарева.
Соңғы жылдары С.Торайғыров атындағы мемлекеттік университет өңірдегі кәсіпорындармен бірлесіп жұмыс істеуде. Университет жергілікті 278 өндіріс орнымен екіжақты келісімшарт жасаған. Студенттер 1-курстан бастап кәсіби тәжірибеден өтеді, 2-курста болашақ мамандығын кәсіпорында жүріп игереді. Оқу үдерісіне өндірістік жетекші мамандар мен серіктес шетелдік жоғары оқу орындарының ғалымдары қатысады.
Университеттің «Электртехника және автоматтандыру» кафедрасының аға оқытушысы Юлия Поповецтың айтуынша, кәсіпорындарға экскурсия ұйымдастыру жоғары оқу орындарының түлектерін жұмысқа тартудың тиімді жолы.
– Бізге кәсіпорындардың өкілдері жиі келіп, өндірістік тақырыптарға сай таныстырылымдар жасайды. Студенттерге өндірісті таныстыру – әрі қызықты, әрі қажет, бұл өте пайдалы, – дейді ол.
Университет 2014 жылдан бері «Серпін» бағдарламасы бойынша «Мәңгілік ел жастары – индустрияға!» атты техникалық және аграрлық мамандықтар бойынша маман дайындайды. Биылғы оқу жылында 16 білім беру бағдарламасы бойынша тұңғыш түлектер буыны – 267 студент бітіріп шығады. Қазіргі таңда университетте барлығы 20 мамандық бойынша 550 студент білім алуда.
– Мен «Серпін» бағдарламасымен Тараз қаласынан келдім. Ашық есік күні шарасы барысында мамандығымды дұрыс таңдағаныма көз жеткіздім. Мектепте оқып жүргенде Павлодар алюминий зауыты жайлы естіп-білген едім. Енді, міне сол зауытты көрдім. Алған әсерім шексіз. Алдағы уақытта тәжірибе жинақтап білімімді шыңдағым келеді, – дейді түсті металлургия колледжінің студенті Арман Тасул.
Қазір компания кәсіпорындары орналасқан өңірлердегі университет пен колледждерде ERG күндері өтуде.
ПАВЛОДАР
