Аталған бастама көне шаһарда елорда күніне орай ары қарай жалғасын тауып, тараздық тұрғындарды «Төрткүл» кешеніне тағы да шақырды. «Рухани жаңғыру» бағдарламасы аясында мұнда «Қазақ ауылы» этножобасы құрылып, көне Тараз дәстүрін, көшпенділердің бірегей, жарқын және айқын мәдениетін, өткен тарихын жаңғырту мақсатында көпшілікке терең мағлұматтар берді. Ұлттық-мәдени кешенде қала тұрғындары мен қонақтары қазақ халқының бай тарихымен, мәдениетімен, өнерімен және салт-дәстүрімен танысты. Кешенде кез келген адам көшпенділер өркениетінің этномәдени ортасын сезініп, ауылдың күнделікті және мерекелік өміріне көз жүгірте алады.
Сонымен қатар этноауылда қазақ музыкалық және театр өнерінің фестивальдары, қолөнер шеберлерінің шеберлік сыныптары, ұлттық тағамдар, қолөнер және көркемөнер көрмелері, этностық музыкалық фестивальдар, ұлттық спорт түрлерінен де жарыстар өтті. Жиынға Жамбыл облыстық туризм басқармасының және «Тараз-Туризм» туристік ақпараттық орталығының қызметкерлері, облыстың қолөнершілері мен «Асыл арман» ұлттық дәстүрді қолдау мекемесінің мамандары да қатысты. Мұнда мектеп оқушылары да жазғы лагерь уақытында ортағасырлық көне орынмен танысты.
