Руханият • 23 Шілде, 2019

«Астана Операның» алтыншы маусымы аяқталды

112 реткөрсетілді

«Астана Операның» алтыншы театр маусымы ұлттық музыкалық өнердің інжу-маржаны – Е.Брусиловскийдің «Қыз Жібек» операсының қойылымымен тәмамдалды.

Асқақ өнердің жанкүйерлері осынау «театр жылында» бірінен кейін бірі орын алған жарқын оқи­ғалардың куәсіне айналды: тұсау­кесерлер, гастрольдер, опера және балет әртістерінің беделді халық­аралық байқаулардағы же­ңіс­тері, театрдың шетелдік әріп­тестерімен шығармашылық бай­ланысының кеңеюі – осы сынды айтулы сәттер көп болды.

Театрға 145 000 көрермен келді. ҚР Мәдениет және спорт ми­нис­тр­лігінің қолдауымен ұжым 7 премьера ұсынды. Атап айтқанда, Дж.Россинидің «Севильдік шаштараз» операсы, М.Фокиннің хорео­гра­фиясындағы Ф.Шопеннің музыкасына «Шопениана» және Н.Рим­ский-Корсаковтың музыкасына «Ше­херазада» бір бөлімді балеттері, П.Чай­ков­скийдің «Евге­ний Онегин», Дж.Россинидің «Жібек саты», Дж.Пуч­чинидің «Бо­гема» опералары мен А.Адан­ның «Жизель» балеті кө­рер­менге ұсы­нылды.

Театр 2 сыйлыққа ие болды: «Абай» операсы (Л.Хамиди, А.Жұ­банов) үшін авторлар ұжымы: Әл­пиев Төлеубек Нығ­мет­ұлы­на, Бөрі­баев Алан Ас­қар­ұлы­на, Байғо­жин Сүндет Әб­дірах­манұлына, «Ас­тана Опе­ра» мем­лекеттік опера және ба­лет театры» коммерциялық емес ак­ци­о­­нерлік қоғамының шы­ғар­ма­шы­лық ұжымына қа­тысушыларға Қазақстан Рес­публикасының Әде­биет пен өнер саласындағы Мем­лекеттік сыйлығы берілді. Со­ны­мен қатар театр классикалық өнер сала­сындағы «BraVo» Халық­ара­лық кә­сіби музыкалық сый­лығын ие­лен­ді, бұл додада «Астана Опера» «Жыл­дың концерттік/театр алаңы» ата­лымы бойынша көшбасшы атанды.

Ұжым «Рухани жаңғыру» бағ­дарламасы аясында гастрольдік сапарларға шығып, Италия (Генуя, Рим), Испания (Валенсия), Ресей (Мәскеу, Новосібір), Өзбекстан (Таш­кент) елдері мен Қазақстан қа­ла­лары (Қарағанды, Көкшетау) бо­йынша сәтті өнер көрсетті. Театр өз сахнасында Абай атын­дағы МАОБТ-ның (Алматы) гас­трольдік бағ­дарламасын қабыл алды, ал та­мыздың 17 және 24 күндері Қара­ғанды академиялық му­зыкалық комедия театрының гастролі өтпек.

Өзбекстандағы Қазақстан жылы аясында орасан зор жетістікпен өткен Ташкенттегі гастрольде әр­тіс­­тер ұлттық классика жауһары – А.Жұбанов, Л.Хамидидің «Абай» опе­­­расы мен Дж.Пуччинидің «Ма­дам Баттерфляй» операсын ұсын­ды.

Жыл бойы «Астана Опера» әр­тістері өз жетістіктерімен қуант­ты, олар үкіметтік марапаттар, ор­ден­дер мен медальдерін ие­ленді, сондай-ақ көптеген халық­ара­лық байқаулардың жеңім­паз­дары атанды. Атап өтсек, «Ас­тана Опера» дирижері Руслан Баймурзин КСРО Халық әртісі, Мем­лекеттік сыйлық лауреаты Мұ­қан Төлебаев атындағы «Алтын таяқша» Халықаралық дирижерлер бай­қауының Бас жүлдесін жеңіп алды.

Опера және балет труппасының солистері «Астана Операның» атын шығарып қана қоймай, Қазақ­стан­ның беделін шетелде оңынан қалыптастыруда елеулі үлес қосуда. «Астана Опера» театрының жетекші солисі, Қазақстанның еңбек сіңірген қайраткері Бақтияр Адамжан Италия, Швейцария, Франция, Ресей және т.б. ел­дер­дің ең мәртебелі мәдени іс-шараларына тұрақты түрде қа­тысуда. Бұдан бөлек, Бақтияр Адам­жан Әйгерім Бекетаевамен бірге Канн қала­сындағы Фестиваль сарайы сахнасында өнер көрсетті. «Viva Maïa» әлемдік балет жұлдыз­дарының Гала-концерті аты аңыз­ға айналған балерина Майя Пли­сецкаяға арналған.

«Астана Операның» жетекші солисі, Қазақстанның еңбек сіңір­ген қайраткері Жұпар Ғабдул­лина Башқұрт опера және балет театры сахнасында зор жетістікпен өнер көрсетті. Әнші атақты бас Иль­дар Абдразаковпен бірге Дж.Вер­дидің «Аттила» операсын­да басты Ода­белла партиясын орын­дады. «Астана Операның» жетекші солисі, Қазақ­станның еңбек сіңірген қайрат­кері, ҚР Мемлекеттік сыйлығының лауреаты Сүндет Байғожинның өнеріне итальяндық тыңдарман ду қол шапалақ соғып, қошемет көрсетті. Танымал қазақстандық баритон генуялық Карло Феличе театрының сахнасында Дж.Пуччинидің «Мадам Баттерфляй» опера­сында Шарплестің партиясын ұсынды.

«Астана Опера» театрының со­лисі Евгений Чайников Барсе­лонадағы испандық Театр де Саррия сахнасында әйгілі музыкалық директор, тенор әрі педагог Рауль Хи­менестің жетекшілігімен композитор Доменико Чимарозаның «Жасырын неке» (Il matrimonio segreto) операсын орындады.

 «Астана Опера» өзінің жетінші театр маусымын 5 қыркүйекте Мұқан Төлебаевтың «Біржан – Сара» операсымен ашпақ. Сонымен бірге, күз мезгіліне, 11 және 13 қазан күндеріне Дж.Вердидің «Дон Карлос» операсы мен 22-23 қа­раша күндеріне Л.Де­либтың «Коппелия» балетінің премьерасы жос­пар­ланған. Опера труппасы 20 қазан күні Невадағы Санкт-Петер­бор қаласына Дж.Россинидің «Жі­бек саты» опе­­расымен аттанады. Алайда бағ­дар­лама мұнымен тамамдалмақ емес!

 

 

Баннер
Соңғы жаңалықтар

120 келі тартатын торпақ көтерді

Аймақтар • Бүгін, 14:31

Ұқсас жаңалықтар