Әрине Еуропа лигасында «Астанаға» жеребе жолдас болды деп жатқандар да жоқ емес. Чемпиондық жолда сынға түсіп жатқан елорда командасы алдымен Андорра чемпионы «Санта Колома» клубын жеңсе, үшінші іріктеуде Мальтаның үздік командасы «Валлеттаның» тас-талқанын шығарды.
Өткен бейсенбі күні «Астана» Мальтаға сапар шегіп, «Валетта» командасымен үшінші іріктеудің қарымта матчын өткізді. Алғашқы ойында 5:1 есебімен жеңіске жеткен отандастарымыз бұл жолы да 0:4 нәтижесімен басым түсті. Өткен ойынмен салыстыратын болсақ, қарымта кездесуде «Астана» сапында аздаған өзгеріс болғанын байқадық. Бүгінге дейін команданың негізгі ойыншысы атанып келген Серікжан Мұжықов бір айдан бері негізгі құрамнан орын ала алмай, қосалқы құрамда қалған болатын. Матч алдында бас бапкер Роман Григорчук қазақстандық футболшыны бірінші минуттан алаңға шығарды. Сондай-ақ Роман Мұртазаев та бұл жолы негізгі құрамнан орын алды. Бұл кездесуде Мұжықов-Мұртазаев тандемі көп күттірмей-ақ өз жемісін берді. Матчтың 25-минутында Серікжаннан тамаша пас алған Роман Мұртазаев қорғаушылардан оңай сытылып шығып, есепті ашты. Арада 12 минут өткенде команданың ақтангері Марин Томасов есепті 2:0-ге жеткізді. Жалпы, аталған ойын Мұртазаев пен Томасовтың бенефисіне айналды десек қателеспейтін шығармыз. Матчтың екінші бөлігінде де қос футболшы бір-бір голдан соғып, «Астанаға» ірі жеңіс сыйлады. 68-минутта Мұртазаев командасының үшінші голын соқса, 89-минутта Томасов кездесудің нүктесін қойды. Есеп – 0:4. Екі ойынның қорытындысы бойынша жерлестеріміз 9:1 есебімен жеңіп, плей-офф кезеңіне жолдама алды.
«Астана» командасы елордада өткен матчта қарсылас қақпасына бес гол соғып, өзіндік рекордты жаңартса, бұл жолы сырт алаңда жауапсыз төрт гол және екі ойынның қорытындысы бойынша 9 гол салып, тағы бір рекордқа өзгеріс енгізді. Елорда командасының бұған дейінгі ең ірі есебі 2014/2015 жылғы Еуропа лигасының бірінші іріктеу кезеңінде тіркелген болатын. Сол жолы «Астана» Арменияның «Пюник» командасымен кездесіп, екі ойын нәтижесі бойынша 6:1 (4:1, 2:0) есебімен басым түсіп еді.
Мальтадағы жеңістен кейін «Астана» Қазақстанның УЕФА рейтингіндегі жағдайын жақсартып, оған қоса өзінің клубтар арасындағы рейтингтегі орнын бекемдей түсті. Қазақстан – 18,500 (2,625) ұпаймен 25-орында болса, «Астана» 28,500 ұпай көрсеткішімен 50-орнын сақтап қалды.
Плей-офф кезеңінде елорда командасы қазақстандық жанкүйерлерге жақсы таныс Белоруссияның БАТЭ клубымен кездеседі. Беларусь командасы бұған дейін қазақстандық командамен екі рет кездесіп, екеуінде де жеңіліп қалған. Ең алғаш Чемпиондар лигасының 2013/2014 жылғы маусымның алғашқы іріктеу кезеңінде Қарағандының «Шахтерімен» ойнап, Еурокубоктағы жорығын ерте аяқтауға мәжбүр болған-ды. Екі ойын қорытындысы бойынша БАТЭ 2:0 есебімен жеңілген. Ал 2016/2017 жылғы Еуропа лигасының плей-офф кезеңінде «Астанамен» кездесіп, топтық кезеңнен тыс қалған еді. Елордада өткен матчта жерлестеріміз 2:0 нәтижесімен басым түссе, сырт алаңдағы ойында 2:2 есебімен тең түскен болатын. Яғни, БАТЭ үшін Қазақстан командалары алынбайтын қамал болып тұр. Бұл жолы да «Астана» ескі дәстүрден жаңылмай, Еуропа лигасының топтық кезеңіне шығады деген үміттеміз.
Еуропа лигасының үшінші іріктеу матчынан кейін «Астана» бас бапкері Роман Григорчук БАТЭ туралы алғашқы пікірімен бөлісті. «БАТЭ Еуропа футболында бірқатар жетістікке жеткен ірі команда. Былайша айтқанда, Беларусь футболының бренді. Құрамында Еурокубок ойындарында әбден ысылған, тәжірибесі толысқан бірнеше ойыншы бар. Бапкері де өте тәжірибелі. Сондықтан бізді алда тартысқа толы екі ойын күтіп тұр. Алдағы ойынға тыңғылықты дайындалып, Еуропа лигасының топтық кезеңіне шығу үшін барымызды саламыз», дейді Р.Григорчук.
Сондай-ақ БАТЭ бас бапкері Алексей Бага да «Астана» туралы аз-кем пікір білдірді. ««Астана»? Мен қорқынышты ештеңе көріп тұрған жоқпын. Өзге елдің кез келген командасын жеңу үшін әдеттегідей дайындаламыз. Еурокубок кезеңдерінде қазақстандық «Шахтер», «Астана» командаларынан үнемі жеңіліп келеміз. Бұл – тарих. Бірақ қазіргі «Астана» жаңа команда, жаңа қарсылас. Өткенмен ешқандай ұқсастығы жоқ», деді Бага.
Ал отандық футбол маманы Болат Есмағамбетов бұған дейін елорда командасы өздерінен бір бас төмен клубтармен ойнап келсе, бұл жолғы қарсылас «Астанамен» деңгейлес екенін айтады. «Шынымды айтсам, «Валеттаға» қарсы алғашқы ойынның бес минутын көріп, команданың деңгейін бірден білдім. Бұл команданы ҚПЛ-дің кез келген клубы жеңе алады деп ойлаймын. «Астананың» сыналатын сәті енді келді. БАТЭ – өте мықты командалардың бірі. Оны жыл сайынғы Еурокубоктағы ойындарынан-ақ байқауға болады. Меніңше, командалар көп гол соқпауы мүмкін. «Астана» да, БАТЭ де өз алаңдарында сәтті ойнайды. Сондықтан бұл жұптың жеңімпазы сырт алаңдағы ойында анықталады. «Астананың» БАТЭ-ге қарсы өтетін ойыны осы маусымдағы ең қызықты матч болмақ», дейді футбол маманы.
Дәл қазіргі уақытта екі команда да өз елдерінің ішкі біріншілігінде екінші орында келеді. Сондай-ақ екеуі де Еуромаусымның іріктеу кезеңін чемпиондар лигасында бастап, Еуропа лигасының плей-офф кезеңінде жолығып отыр. Қос команда арасындағы алғашқы матч 22 тамызда «Астана Арена» стадионында, қарымта матч бір аптадан соң Беларусь елінде өтеді.
