Аймақтар • 21 Тамыз, 2019

Армия ойындарында үшінші орын

158 рет
көрсетілді
4 мин
оқу үшін

Мәскеу облысының Алабино полигонындағы «Патриот» саябағында бесінші халықаралық армия ойындарының салтанатты жабылу рәсімі мен жалпы командалық есептегі жеңім­паздар мен жүлдегерлерді марапаттау рәсімі өтті. Сайыс қоры­тындысы бойынша Қазақстан Қарулы Күштерінің құрамасы үшінші орынды еншіледі. АрХО жабылу рәсіміне еліміз әскери ведомствосының басшысы Н.Ермекбаев арнайы барды.

Армия ойындарында үшінші орын

Ол шетелдік əріптестерімен кез­десті жəне əскери ынты­мақ­тас­тық мəселелерін талқылап, қазақстандық танкішілердің атынан Қазақстан ҚК құрамасын АрХО-да жоғары деңгейде өнер көр­сетулерімен құттықтады. Ұйым­­дас­тырушылар, сарапшылар жəне қатысушылар мерейтой­лық ойынды ауқымды деп мо­йындады.

– Биылғы далалық, те­ңіз жəне əуе машығынан өткен 32 байқауда 39 елден 223 команда бақ сынас­ты. Бұл – рекордтық көр­сеткіш. Одан басқа, байқаулар бір уақытта 10 елдің 21 полиго­нын­да, Каспий жəне Балтық теңіз­дері­нің су айдындарында жəне Парсы шығанағында өтті. Ар­мия ойындарының үш бай­қауы Қазақстанда өтті. Əскери са­йыстың жанкүйерлері мен барлық ниет білдіргендер байқаулардың барысын, жабылу, марапаттау жəне ашылу рəсімдерін шынайы уақыт режімінде бақылап отырды. Онлайн трансляция бірден бірнеше интернет алаңшаларда, сондай-ақ қазақстандық спорт телеарнасының эфирінде көр­се­­­тіл­ді. Екі апта бойы армия ойын­­­дары алаңында көрермен­дер көп болып, əскери кəсіпқой­лардың халықаралық деңгейде үздік деп атанулары үшін сайыс­қа түс­кендерін тамашалады, – деп мәлімдеді министрлік бас­шылығы.

Қазақстан құрамасы бірінші кезеңнен-ақ барлық байқауларда көшбасшылар үштігінен көрініп, сол жетістікті шешуші кезеңге дейін ұстап тұрды. Бұл ретте жеке есепте əскери қызметшілеріміз бір­неше рет үздік нəтижелер көр­сетті.

Сонымен қазақстандық Су-25 экипажы «шабуылдау авиа­­циясы» номинациясында бі­рін­ші орынды иеленді. Əскери дəрігерлер жеке шеберлікте үздік нəтижені, сондай-ақ «Əскери-медициналық эстафета» байқауы аясында шұғыл реанимацияда жоғары кəсібилігін көрсетті. «Чемпиондар жарысында» əс­кери полиция кинологы өзінің қызметтік итімен «Адал дос» бай­қауының ең жоғары рейтингтік командалар арасында бірінші орынды иеленді. «Артиллериялық оқ ату шеберлері» байқауында жеке есепте қазақстандық команда үздік минаатқыш есептоп және үздік гранатаатқыш атағын жеңіп алды. Əскери байланысшылар арасында өткен «сенімді қабылдау» байқауында əскери қызметшілерімізді төрешілер алқасы есту және радиобағдарлау айла-тəсілінде үздік деп таныды. «Далалық ас үй» азық-түлік қызметтерінің байқауында ас­паз­дарымыз ұлттық тағамдар əзірлеуде таңдай қақтырды. Одан басқа, үздік дене дайындығын көрсетіп, қатысушы елдер арасында бірінші орынды еншіледі.

Армиялық ойындардың «Аравт» жаңа ат марафоны бай­­қа­­у­ында Қазақстанның таулы-егерлік полкі Моңғолияның коман­дасынан жеңіліс тапса да, кедергілері бар 130 км қа­шықтықтағы эста­фетада жыл­дамдық пен шебер­лікті паш етті. Атыс қаруын жөн­деуде де əскери қызмет­ші­леріміз көшбасшылар қатарында. Қазақстанның командасы «Қару шебері» байқауында үшінші орын­ды қанжығасына байлады. «Танк биатлоны» ең көзтар­тар байқауының шешуші ке­зеңін қазақстандық команда Ре­сей­лік тарап ұсынған танктерде үшінші болып жүлдегерлер үштігіне ілігіп, ойынды аяқтады. АрХО-2018 танк сайысында қа­зақстандық танкішілер Ресей, Қы­тай және Беларусь командаларынан жеңіліп, құрметті төртінші орынға ие болғанын айта кеткен жөн.

Естеріңізге сала кетсек, қа­зақ­стандық команданы халық­аралық армия ойындарының ұйымдастырушылары байқауға қатысу саны бойынша ең көрнекі деп мойындады. Төрешілер алқасының мүшелері ойын ба­рысын бақылап, Қазақстан əс­кери қызметшілерінің жоға­ры дайындық деңгейлерін, қəсіп­қойлықтары мен жауынгерлік машықтарын атап өтті.