Жақында ол белгілі суретші, «Қазақ елі» монументінің авторы Сенбіғали Смағұлов бастап барған қазақстандық суретшілер құрамында Кипрде болып қайтты. Ресми шақырту биылғы жылдың мамыр айында Forbes тізіміне кірген танымал бизнесмен, кипрлық миллиардер Суат Гюнселден келіп түскен. Білім, денсаулық, банк, қонақүй қызметі, электр желілері секілді бизнестің сан түрімен айналысатын 63 жастағы Суат бей сапардың бар шығынын өз мойнына алып, тек Қазақстан суретшілерін ғана емес, түркі елдерінің, әлемдегі мұсылман мемлекеттеріндегі өнер өкілдерін де шақырып, басқосуды халықаралық симпозиум деңгейінде өткізген. Бауырлас елдердегі қылқалам шеберлерінің мол шоғырын шақырудағы мақсат – Суат Гюнсел ел үкіметімен бірлесіп, үлкен өнер мұражайын ашуды көздейді.
Әлемнің әр қиырынан келген әріптестерімен бірге Гүлназым да екі апта бойы сурет салып, түрлі тақырыпта туынды жазған шетелдік суретшілермен тәжірибе алмасқаны үшін шексіз риза. Симпозиум аясында алты суретшінің жеке көрмесі ұйымдастырылып, олардың қатарында Гүлназымның да шығармашылығын таныстыруға мүмкіндік алғаны қазақ суретшісінің айрықша қолтаңбасына көрсетілген құрмет болса керек.
«Суретшілер симпозиумы керемет өтті. Ақтеңіз жағасында түрлі тақырыпта картиналар салдық, мен үшін қазақстандық және шетелдік әйгілі суретшілермен қатар жұмыс істеу үлкен абырой болды. Бар өнерімді салып, еліміздің намысын қолдан бермес үшін күні-түні еңбек етіп, өз картинамның мазмұнды жазылуына көп көңіл бөлдім», дейді Гүлназым. Оның айтуынша, мәртебелі меймандар қатарында бейнелеу өнерінің білгірлері, министрлер мен жоғары дәрежелі лауазымды тұлғалар арнайы келіп тамашалаған көрме жоғары деңгейде ұйымдастырылған.
Тынысы кең, қазақтың қайталанбас ұлттық дәстүрі негізінде жасалған туындыларын әлем кеңістігіндегі өнердің бүгінгі бағыттарымен тоғыстыру – Гүлназымның бала күннен бергі арманы. Буырқанған бояулардың құпиясын ашпаққа құштар болып, шығармашылық іңкәрлікті күнделікті жұмыс ырғағы етіп белгілеген ол бұл арманын біртіндеп бағындырып келеді де. Түрлі-түсті бояу тілімен жан дүниесінің толқуы мен тебіренісін жеткізіп, оны ұлттық бедер-нақышпен үйлестіре білген Г.Өмірзақтың жұмыстары бүгінде Лондон, Люксембург қалалары мен Германия, Франция, Түркия, Ресей елдеріндегі өнер галереяларында сақтаулы тұр. Талғаммен салынған туындылары заманауи дизайн сұранысына толықтай сай болғандықтан бірқатар картинасы мемлекеттік мекемелер мен қоғамдық ұйымдардың интерьеріне қойылған.
АЛМАТЫ