Мектепке дейінгі білім. Білім және ғылым министрлігінің мәлімдеуінше, биыл мектепке дейінгі ұйымдар саны 279 бірлікке көбейіп, барлығы 10 мың 593-ке жеткен. Оның 62,1 пайызы, яғни 6 мың 580-і – мемлекеттік, ал қалған 37,9 пайызы, яғни 4013-і – жекеменшік балабақшалар. Бұдан бұрын да хабарлағанымыздай, 3-6 жастағы балалардың мектепке дейінгі біліммен қамтылуы 95,2% құрап отыр, 10 мыңнан аса мектепке дейінгі ұйымға 906,5 мың бала барады.
Орта білім. Еліміздегі 7016 мектеп алдағы жаңа оқу жылында 3 млн 200-ге тарта білім алушыға есігін ашты. Соның ішінде 406,7 мың бала алғаш рет мектеп табалдырығын аттады. Ережеге сай балаларды 1-сыныпқа қабылдау жұмыстары 31 тамызға дейін жалғасқандықтан, бұл көрсеткіш әлі де көбеюі мүмкін. Бұл былтырғымен салыстырғанда 20 мыңға көп. Себебі 2016 жылы «Білім туралы» заңға 6 жастан бастап мектепке қабылдау жөнінде өзгерістер енгізілді. Баланың 6 жастан мектепке баруы міндетті болмаса да, ата-аналардың көбісі 12 жылдықты ескеріп, ертерек беруді қолай көреді. Осының әсерінен мектептерде орын тапшылығы артып отыр. Айталық, бас қалада 2055, Алматы облысында 10884, ал Атырау өңірінде 1010 орын жетпейді.
Жаңа оқу жылында 4, 9, 10 сыныптар жаңартылған білім мазмұнына көшті, соған сәйкес 280 мыңға жуық мұғалім арнайы курстардан өтті. Жоғары сыныптарда таңдау бойынша «Кәсіпкерлік және бизнес», «Графика және жобалау» пәндері енгізіліп, «Алғашқы әскери және технологиялық дайындық», «Информатика» пәнінің мазмұны өзгертілді.
Білім ошақтарының жай-күйіне келсек, қазіргі таңда 128 үш ауысымды және 31 апатты мектеп бар. Бұл мәселені шешу мақсатында мемлекеттік бюджет есебінен 115, жекеменшік бюджет есебінен 79 мектептің құрылысы жүріп жатыр. Үкімет қаржысына салынып жатқан мектептің 57-сі биыл тапсырылады. Жаңа оқу жылы қарсаңында Нұр-Сұлтан қаласында, Ақтөбе, Алматы, Солтүстік Қазақстан, Қызылорда, Жамбыл, Батыс Қазақстан, Түркістан облыстарында жаңа мектептер іске қосылды.
Жекеменшік мектептерде жан басына нормативтік қаржыландыруды енгізу жұмыстары басталды. Жан басына қаржыландыру енгізілгенге дейін 121 жекеменшік мектеп болса, бүгінде бұл 146-ға жеткен. Алдағы қаңтар айынан бастап республикалық бюджетте елдегі барлық жекеменшік мектептерде мемлекеттік тапсырысты орналастыруға қаражат көзделді. 22 мың 310 баланы мектеппен қамтамасыз ету үшін 80 жекеменшік білім ошағы мемлекеттік тапсырыс алып отыр. 1 тамыздағы жағдай бойынша 8 мың 636 орынға 25 жекеменшік мектеп ашылды. Жыл соңына дейін оның 23-і іске қосылмақ, бұл 5 мың 845 орынға лайықталған.
Кәсіптік-техникалық білім беру. Колледждер саны қаз-қалпында қалды, яғни республика бойынша 821 колледж Білім күнінде 488,7 мың студентті қарсы алды. Кәсіптік-техникалық білім беретін ұйымдардың 90 пайызы күрделі жөндеуден өткізілген. 22 мемлекеттік колледжде күрделі жөндеу жұмыстары әлі де жүргізілуде. Жаңа оқу жылының басында жатақханаларда 1085 жаңа орын берілмек.
Жоғары білім. Қазақстанда 132 жоғары оқу орны жұмыс істейді: оның 11-і – ұлттық, 30-ы – мемлекеттік; 14-і – азаматтық емес; дербес білім беру ұйымы (ДББҰ) мен халықаралық деңгейдегісі – 1-ден; 18-і – акционерлік және 57-і жекеменшік оқу орындары саналады.
Ұлттық бірыңғай тестілеу қорытындысы бойынша күндізгі оқу бөлімінің 1-курсына 46 698 грант бөлінді. Колледж түлектері үшін 3 000 грант, дайындық бейіні бойынша оқуға қабылданғандары тағы бар. Биыл бакалавриатқа барлығы 51 085 орынға мемлекеттік тапсырыс берілген. Магистратураға
13 179, докторантураға 2 322 грант бөлінген. Жоғары оқу орнынан кейінгі білім алушыларды университеттерге қабылдау әлі жалғасып жатыр. Осыған байланысты магистранттар мен докторанттар оқуды сәл кейінірек бастайды. Айта кетейік, өз қаражаты есебінен 17 ЖОО-да күрделі,
32-нде ағымдағы жөндеу жүргізілді.
